Tamil News Update

சனி, 29 ஜூலை, 2023

இன்றைய ராசிபலன் 30.07.23 | Horoscope | Today RasiPalan | ஞாயிற்றுக்கிழமை | July 30 |Daily RasiPalan

மேஷம் முதல் மீனம் வரையிலான 12 ராசிகளுக்கான ராசி பலன்களைக் கணித்துத் தந்திருக்கிறார் ஜோதிடர் ஶ்ரீரங்கம் கார்த்திகேயன்.

source https://www.vikatan.com/spiritual/astrology/30072023-daily-rasi-palan-daily-horoscope-astrology-sakthi-vikatan

வெள்ளி, 28 ஜூலை, 2023

அடுத்து மும்பையில்... வேகமெடுக்கும் ’இந்தியா’ கூட்டணியின் அடுத்த மூவ் என்ன?!

மத்தியில் இருக்கும் மோடி ஆட்சியை வீழ்த்த வேண்டும் என்று பெரும்பாலான எதிர்க்கட்சிகள் ‘இந்தியா’ கூட்டணியைக் கட்டமைத்திருக்கின்றன. முதல் கூட்டத்தை பட்னாவிலும், இரண்டாவது கூட்டத்தை பெங்களூருவிலும் நடத்திய எதிர்க்கட்சிகள், மூன்றாவது கூட்டத்தை வரும் ஆகஸ்ட் 25, 26 ஆகிய தேதிகளில் மும்பையில் நடத்தவிருக்கின்றன.

வெறுமனே கூட்டம் போட்டு விவாதிப்பது, கலைந்து செல்வது என்றல்லாமல், முக்கியமான முடிவுகளையும் அவர்கள் எடுத்திருக்கிறார்கள். ‘இந்தியா’ கூட்டணியில் இடம்பெற்றுள்ள நிதிஷ்குமார் முதல்வராக இருக்கும் பீகாரிலும், காங்கிரஸ் கட்சி ஆட்சியில் இருக்கும் கர்நாடகாவிலும் கூடிய எதிர்க் கட்சிகள், இந்த முறை ‘இந்தியா’ கூட்டணி ஆட்சியில் இல்லாத மும்பையில் கூடுகின்றன என்பது குறிப்பிடத்தக்கது. மும்பை கூட்டத்துக்கு காங்கிரஸ் கட்சியும், உத்தவ் தாக்கரே தலைமையிலான சிவசேனாவும், சரத்பவார் தலைமையிலான தேசியவாத காங்கிரஸ் கட்சியும் ஏற்பாடுகளைச் செய்கின்றன.

சிவசேனாவை உடைத்து, தேசியவாத காங்கிரஸை உடைத்து மகாராஷ்டிராவில் பா.ஜ.க அதிகாரத்தில் இருக்கும் நிலையில், அந்த மாநிலத்தின் தலைநகரில் இந்தியா கூட்டணியில் இடம்பெற்றிருக்கும் 26 கட்சிகளின் தலைவர்கள் கூடவிருப்பது முக்கியத்துவம் வாய்ந்ததாகக் கருதப்படுகிறது. இரண்டாவது கூட்டத்திலேயே தங்கள் கூட்டணிக்கு ‘இந்தியா’ என்று பெயர் வைத்து, ஆளும் தரப்புக்கு அதிரவைத்தவர்கள், மும்பை கூட்டத்தில் பல முக்கிய முடிவுகளை எடுக்கப்போகிறார்கள் என்று செய்திகள் தெரிவிக்கின்றன.

பெங்களூரு கூட்டத்தில் சோனியா காந்தி, ஸ்டாலின், மம்தா பானர்ஜி

மும்பை கூட்டத்தில் தங்கள் கூட்டணிக்கான குறைந்தபட்ச பொதுத்திட்டத்தை உருவாக்க இந்தியா அணி திட்டமிட்டுவருகிறது. அதற்காக, இந்தியா அணியில் இருக்கும் கட்சிகளின் பிரதிநிதிகள் அடங்கிய குழுவும் அமைக்கப்படவிருக்கிறது. வரும் நாடாளுமன்றத் தேர்தலில் பா.ஜ.க-வைத் தோற்கடிப்பதே அவர்களின் முக்கிய நோக்கம். அதனால்தான், பல்வேறு முரண்டுபாடுகளைக் கொண்டிருந்தபோதிலும், இந்த கட்சிகள் ஓரணியில் திரண்டிருக்கின்றன.

வரும் நாடாளுமன்றத் தேர்தலில் பா.ஜ.க வேட்பாளர்களுக்கு எதிராக ஒவ்வொரு தொகுதியிலும் எதிர்க் கட்சிகளின் சார்பில் பொது வேட்பாளரை நிறுத்துவது என்கிற உத்தி குறித்து இந்தியா அணி ஆலோசித்துவருகிறது. அது பற்றிய முக்கிய ஆலோசனை மும்பையில் நடக்கவிருக்கும் கூட்டத்தில் நடைபெறும் என்கிறார்கள்.

இது பற்றிய முடிவுகளை ஒரே கூட்டத்தில் எடுத்துவிட முடியாது என்றும், இரண்டு கூட்டங்களிலாவது இது பற்றி பேச வேண்டியிருக்கும் என்றும் காங்கிரஸ் கட்சியின் அகில இந்திய பொதுச்செயலாளர் கே.சி.வேணுகோபால் கூறியிருக்கிறார்.

‘இந்தியா’ என்று எதிர்க்கட்சிகள் கூட்டணியை பெயரை மோடி கடுமையாக விமர்சித்திருக்கிறார். இந்தியா என்ற பெயர் இந்தியன் முஜாகிதீன், கிழக்கிந்திய கம்பெனி, பாப்புலர் ஃப்ரன்ட் ஆஃப் இந்தியா ஆகிய பெயர்களிலும் இருக்கிறது என்று சாடினார் பிரதமர். இந்தியா என்ற பெயரே ஆளும் பா.ஜ.க-வை அச்சமடையச் செய்திருக்கிறது. அதன் வெளிப்பாடுதான் பிரதமரின் பேச்சு என்று எதிர்க்கட்சிகள் பதிலடி கொடுத்தன.

‘இந்தியாவின் விடுதலைக்காக நேதாஜி சுபாஷ் சந்திரபோஸ், இந்திய தேசிய ராணுவத்தை ஆரம்பித்தார். அது பிரதமர் மோடிக்கு தெரியுமா?’ என்று ட்வீட் செய்தார் சி.பி.எம் பொதுச்செயலாளர் சீதாராம் யெச்சூரி. ‘இந்தியா’வுக்கு எதிராக மோடி பேசுகிறார் என்றும் எதிர்க்கட்சித் தலைவர்கள் பேச ஆரம்பித்தனர். ‘இந்தியாவைக் காக்க இந்தியா அணியை உருவாக்கியிருக்கிறோம் என்றார் முதல்வர் ஸ்டாலின். இந்த நிலையில், ஆளும் பா.ஜ.க-வுக்கு அரசியல் ரீதியாக பல சவால்களை ஏற்படுத்தும் வகையில் மும்பை கூட்டத்தில் இன்னும் பல முடிவுகளை எடுப்போம் என்கிறார்கள் `இந்தியா’ அணி தலைவர்கள்.

source https://www.vikatan.com/government-and-politics/politics/what-is-the-next-move-of-india-opposition-alliance

``அண்ணாமலை யாத்திரையுடன் தமிழகத்தில் பாஜக சரித்திரம் முடிவுக்கு வரும்!"- முத்தரசன் காட்டம்

விருதுநகர் மாவட்டம் ராஜபாளையத்தில் தமிழ் மாநில விவசாய தொழிலாளர் சங்கத்தின் 13-ம் மாநில மாநாடு நேற்று (28-07-2023) தொடங்கியது. இதில் தமிழக இந்திய இம்யூனிஸ்டு கட்சி மாநில செயலாளர் முத்தரசன், விவசாய தொழிலாளர் சங்கத்தின் தேசிய பொதுச்செயலாளர் குல்சார்சிங் கொரியா உள்ளிட்டோர் கலந்துகொண்டனர்.

அப்போது சி.பி.ஐ.மாநில செயலாளர் முத்தரசன் செய்தியாளர்களுக்கு பேட்டி அளித்தார். அப்போது அவர் கூறுகையில், "விவசாயத்தில் 1 கோடிக்கும் அதிகமான தொழிலாளர்கள் உள்ளநிலையில் விவசாயத்துக்கென தனித்துறை உருவாக்க வேண்டும். கலைஞர் ஆட்சியில் இருந்ததுபோல விவசாய தொழிலாளர்களுக்கு நலவாரியம் அமைக்க வேண்டும்.

மகாத்மா காந்தி வேலை உறுதியளிப்பு திட்டத்தில் வேலை நாட்களை 200 நாட்களாக அதிகப்படுத்தி, இத்திட்ட தொழிலாளர்களை விவசாய பணிகளிலும் ஈடுபடுத்த வேண்டும். இலவச வீட்டு மனை பட்டாவுடன் அருகே பயிர் சாகுபடிக்கு தேவையான நிலத்தையும் வழங்க வேண்டும். தீண்டாமை என்பது அரசியல் சாசன சட்டத்தில் இருந்து நீக்கப்பட்டாலும் இன்னும் வேங்கை வயல் உள்ளிட்ட நிகழ்வுகள் தொடர்ந்து கொண்டேதான் இருக்கிறது.

பல இடங்களில் இரட்டை குவளை முறை கடைப்பிடிக்கப்பட்டு வருகிறது. இதை முற்றிலும் நீக்க நடவடிக்கை எடுக்கவேண்டும். தமிழகத்தில் ஆணவப் படுகொலையை தடுக்க தனிச்சட்டம் இயற்ற வேண்டும். நெற்கதிர்களை அறுவடை செய்யும் நேரத்தில் மூர்க்கத்தனமான முறையில் என்.எல்.சி. நிறுவனம் நிலம் கையகப்படுத்துவது ஏற்கதக்கதல்ல. அறுவடை முடியும் வரை அதிகாரிகள் காத்திருக்க வேண்டும்.

அண்ணாமலையின் யாத்திரையுடன் பா.ஜ.க. சரித்திரம் தமிழகத்தில் முடிவுக்கு வருகிறது. ராகுல் காந்தி நடத்திய யாத்திரைக்கும், அண்ணாமலை யாத்திரைக்கும் வித்தியாசம் உள்ளது. அண்ணாமலை ஒரு விளம்பர பிரியர். தனது செய்தி தினமும் வரவேண்டுமென அவர் விரும்புகிறார். இது விளம்பரத்திற்காக நடத்தும் யாத்திரை. இதனால் எந்த விளைவும் ஏற்பட போவதில்லை.

வரும் நாடாளுமன்றத் தேர்தலில் மூன்றாவது அணி என்பது உருவாக வாய்ப்பு இல்லை. அப்படி உருவாகினாலும் பாஜகவின் பி-டீம் ஆகத்தான் இருக்கும். எத்தனை அணி உருவானாலும் இந்தியா என்ற அணி தான் மகத்தான வெற்றி பெறும். நாடாளுமன்றத்திற்கு வராமல் ஓடி ஒளிந்து கொண்டிருக்கும் மோடி இனி நாட்டிற்கு தேவையில்லை. கொடநாடு கொலை, கொள்ளை வழக்கை விரைந்து விசாரிக்க தமிழக அரசு நடவடிக்கை எடுக்க வேண்டும்" என்றார்.

source https://www.vikatan.com/government-and-politics/politics/rajapalayam-cpi-tn-state-secretary-mutharasan-press-meet

முதலீட்டில் மந்தை மனப்பான்மை கூடாது!

மனிதர்களிடம் இருக்கும் பல்வேறு மனச் சாய்வுகளில் (Bias) முக்கியமானதாக இருக்கிறது மந்தை மனப்பான்மை. ஃபாஸ்ட் புட் கடை வைத்து இரண்டு பேர் ஜெயித்துவிட்டால், உடனே 200 பேர் ஃபாஸ்ட் புட் கடைகளைத் திறந்துவிடுவார்கள். கார் வைத்துக்கொள்வதுதான் கெளரவம் என்று நினைத்து அக்கம்பக்கத்தில் கார் வாங்கினால், உடனே பலரும் கார்களை வாங்கத் தொடங்கிவிடுவார்கள்.

எல்லா விஷயங்களிலும் நிலவும் இந்த மந்தை மனப்பான்மை, முதலீட்டிலும் முக்கியமான பங்கு வகிக்கிறது என்பதற்கு மிகச் சிறந்த உதாரணம், அண்மைக் காலங்களில் ஸ்மால்கேப் பங்குகளில் பெருமளவு பணம் முதலீடு செய்யப்பட்டு வருவதுதான்.

கடந்த ஜூனில் ஈக்விட்டி ஃபண்டுகளுக்கு வந்த முதலீடு ரூ.57,420 கோடி. இதில் ஸ்மால்கேப் ஃபண்டுகளில் மட்டும் ரூ.5,472 கோடி முதலீடு செய்யப்பட்டுள்ளது. அது மட்டுமல்ல, கடந்த மூன்று மாத காலத்தில் நிப்பான் ஸ்மால்கேப் ரூ.2,400 கோடி, குவான்ட் ஸ்மால்கேப் ரூ.1,360 கோடி, ஹெச்.டி.எஃப்.சி ஸ்மால்கேப் ரூ.1,300 கோடி, டாடா ஸ்மால்கேப் ரூ.1,100 கோடி என முதலீடு செய்திருக்கிறார்கள் முதலீட்டாளர்கள்.

கடந்த காலங்களில் ஸ்மால்கேப் வகை ஃபண்டுகள் மிக மிக அதிகமான லாபம் தந்ததே இந்த வகை ஃபண்டுகளை முதலீட்டாளர் தேடிச் செல்ல முக்கியமான காரணம். உதாரணமாக, நிப்பான் இந்தியா ஸ்மால்கேப் 23.95%, எஸ்.பி.ஐ ஸ்மால்கேப் 22.18%, குவான்ட் ஸ்மால்கேப் 21.26%, கோட்டக் ஸ்மால்கேப் 20.20% லாபம் தந்துள்ளன. 15% முதல் 20% வரை லாபம் தந்த ஸ்மால்கேப் ஃபண்டுகள் இன்னும் பல உள்ளன. அபரிமிதமான இந்த வருமானம் பலரையும் ஸ்மால்கேப் ஃபண்டுகள் பக்கம் சுண்டி இழுக்கிறது.

மியூச்சுவல் ஃபண்ட் முதலீடு என்று வரும்போது கடந்த கால வருமானத்தை மட்டுமே அடிப்படையாக வைத்து முதலீடு செய்யக் கூடாது. பங்கு சார்ந்த எந்த வகை ஃபண்ட் திட்டமாக இருந்தாலும், அதில் உள்ள பங்குகள் எதிர்காலத்தில் எந்தளவுக்கு லாபம் ஈட்ட வாய்ப்புள்ளது என்பதை ஆராய்ந்து, அந்த வகை ஃபண்ட் திட்டத்தை முதலீட்டாளர்கள் தேர்வு செய்ய வேண்டும்.

மேலும், ஸ்மால்கேப் ஃபண்டுகள் குறுகிய காலத்தில் அதிக ஏற்ற, இறக்கத்துடன் இருக்கும் குணம் கொண்டவை. இந்த ரிஸ்க் நமக்கு ஏற்றதாக இருக்குமா என்பதைப் பார்த்துதான் அதில் முதலீடு செய்ய வேண்டும். தவிர, நம்மிடம் உள்ள மொத்தப் பணத்தையும் ஸ்மால்கேப் ஃபண்டுகளில் முதலீடு செய்யக் கூடாது. நம் போர்ட்ஃபோலியோவில் எவ்வளவு சதவிகிதம், ஸ்மால்கேப் ஃபண்டுகளில் இருக்கலாம் என்பதை முடிவு செய்து அதற்கேற்ப அதில் முதலீடு செய்ய வேண்டும்!

இந்த விஷயங்களை எல்லாம் கவனிக்காமல் ஸ்மால்கேப் ஃபண்டைத் தேர்வு செய்வது, நம் உடம்புக்கு ஒப்புக்கொள்ளாத உணவை சாப்பிட்டுவிட்டு அவஸ்தைப் படுவது மாதிரிதான்.

முதலீடு விஷயத்தில் மந்தை மனப்பான்மையைத் தவிர்த்து செயல்பட்டால், நாம் என்றும் வருத்தப்பட வேண்டிய அவசியம் இருக்காது!

- ஆசிரியர்

source https://www.vikatan.com/personal-finance/money/guidance-for-investment-strategy-2

இன்றைய ராசிபலன் 29.07.23 | Horoscope | Today RasiPalan | சனிக்கிழமை | July 29 | Daily RasiPalan

source https://www.vikatan.com/spiritual/astrology/29072023-daily-rasi-palan-daily-horoscope-astrology-sakthi-vikatan

வியாழன், 27 ஜூலை, 2023

புதுச்சேரி: அரைகுறை ஆடையுடன் இரவில் வீடியோ கால்; தாயைக் கொலைசெய்த மகனுக்கு ஆயுள் தண்டனை!

புதுச்சேரி, நெல்லித்தோப்பைச் சேர்ந்த ஜெயசேகர் என்பவருக்கு மூன்று மனைவிகள். 2013-ல் ஜெயசேகர் இறந்துவிட, இரண்டாவது மனைவியான ஜெயமேரி தன்னுடைய மகன் அமலோற்பவநாதனுடன் வசித்து வந்தார். அதையடுத்து ஜெயசேகரின் மூன்றாவது மனைவி செல்விக்கும், இரண்டாவது மனைவியான ஜெயமேரிக்கும் கணவரின் சொத்துகள் யாருக்கு என்பதில் அடிக்கடி தகராறு ஏற்பட்டது. அதனால் ஜெயமேரி தன்னை எதாவது செய்துவிடுவாரோ என்று பயந்த செல்வி, கள்ளக்குறிச்சியில் அ.தி.மு.க-விலிருந்த தன்னுடைய சகோதரன் மணவாளன் என்பவரை புதுச்சேரிக்கு அழைத்து தனது பாதுகாப்புக்காக வீட்டில் தங்கவைத்துக்கொண்டார். 2014-ம் ஆண்டு அந்த மணவாளனை கூலிப்படையினர் மூலம் கடத்திக் கொலைசெய்தார் ஜெயமேரி. அந்த வழக்கில் ஜெயமேரி, பிச்சவீரன்பேட் பகுதியைச் சேர்ந்த ரௌடி சோழன் உள்ளிட்ட 8 பேரைக் கைதுசெய்து சிறையில் அடைத்தது காவல்துதுறை.

அதையடுத்து அந்த வழக்கிலிருந்து ஜாமீனில் வெளியே வந்த ஜெயமேரி, கிருஷ்ணா நகரில் புதிய வீடு ஒன்றை வாங்கி தன்னுடைய மகன் அமலோற்பவநாதனுடன் குடியேறினார். படித்திருந்த அமலோற்பவநாதன் வேலைக்குச் செல்லாமல் வீட்டிலேயே இருந்திருக்கிறார். அதனால் இருவருக்குமிடையே அடிக்கடி பிரச்னை ஏற்பட்டிருக்கிறது. அதேபோல சிறைக்குச் சென்று வந்த ஜெயமேரி, இரவில் ஆண் நண்பர்களுடன் மணிக்கணக்கில் செல்போனில் பேசி வந்திருக்கிறார். அதைக் கண்டித்த அமலோற்பவநாதனுக்கும், ஜெயமேரிக்கும் இடையே அடிக்கடி தகராறு ஏற்பட்டிருக்கிறது. அதன் பிறகும் ஜெயமேரி ஆண் நன்பர்களுடன் பேசுவதை நிறுத்தாமல் தொடர்ந்திருக்கிறார். 2019-ம் ஆண்டு மார்ச் 12-ம் தேதி உருளையன்பேட்டை காவல் நிலையத்துக்குச் சென்ற அமலோற்பவநாதன், ‘ஒரு வாரத்தகு முன்பு என் அம்மாவைக் கத்தியால் குத்திக் கொலைசெய்துவிட்டேன். அவரின் சடலத்தை வீட்டின் அறையில் பூட்டி வைத்திருக்கிறேன்’ என்று கூற, பணியில் இருந்த போலீஸார் அதிர்ந்து போயிருக்கின்றனர்.

உடனே சுதாரித்துக்கொண்ட போலீஸார் கொலை நடைபெற்ற பகுதி லாஸ்பேட்டை காவல் நிலைய எல்லைக்குட்பட்டது என்பதால், அவரை ஜீப்பில் அழைத்துச் சென்று லாஸ்பேட்டை போலீஸாரிடம் ஒப்பபடைத்தனர். அதையடுத்து அமலோற்பவநாதன் கூறிய வீட்டுக்குச் சென்றபோது, அங்கு கடுமையாக துர்நாற்றம் வீசியிருக்கிறது. அதன் பிறகு கிராம நிர்வாக அதிகாரி வரவழைக்கப்பட்டு, போலீஸார் குவிக்கப்பட்டு அந்த வீட்டை திறந்தனர். அங்கே அழுகிய நிலையில் ஜெயமேரியின் உடலைக் கைப்பற்றிய போலீஸார் மருத்துவமனைக்கு அனுப்பி வைத்தனர். அந்த வழக்கு தொடர்பாக நம்மிடம் பேசிய விசாரணை அதிகாரிகள், ``சிறைக்குச் சென்று வந்த ஜெயமேரிக்கு நிறைய ஆண் நண்பர்களுடன் தொடர்பு ஏற்பட்டிருக்கிறது. அவர்களுடன் பேசியது பிடிக்காமல் கண்டித்த அமலோற்பவநாதனுக்கும், ஜெயமேரிக்கு இடையே தினமும் சண்டை நடந்திருக்கிறது. 2019 மார்ச் 5-ம் தேதி அதிகாலை 4 மணிக்கு தூங்கிக் கொண்டிருந்த அமலோற்பவநாதன், ஏதோ பேச்சுக் குரல் கேட்டு எழுந்திருக்கிறார். அப்போது தாய் ஜெயமேரியின் அறையிலிருந்து வெளிச்சம் வரவே, அங்கு சென்று பார்த்திருக்கிறார்.

அப்போது ஜெயமேரி ஆண் ஒருவருடன் அரைகுறை ஆடையுடன் வீடியோ காலில் பேசிக் கொண்டிருந்திருக்கிறார். அதைப் பார்த்த அமலோற்பவநாதனுக்கு கடும் கோபம் ஏற்பட்டிருக்கிறது. அதனால் அங்கிருந்த நாற்காலியால் தாய் ஜெயமேரி தலையில் அடித்திருக்கிறார். அதில் நிலைகுலைந்துபோன ஜெயமேரி ரத்த வெள்ளத்தில் மயங்கி விழுந்திருக்கிறார். அதிலும் ஆத்திரம் அடங்காத அமலோற்பவநாதன், சமையல் அறைக்குச் சென்று கத்தியை எடுத்து அரைகுறை மயக்கத்தில் இருந்த ஜெயமேரியின் கழுத்தில் சரமாரியாக குத்தியிருக்கிறார். அதனால் அதே இடத்தில் துள்ளத் துடிக்க உயிரிழந்தார் ஜெயமேரி. பின்னர் அவரின் உடலை வேறு ஓர் அறைக்கு இழுத்துச் சென்று போட்டு பூட்டிய அமலோற்பவநாதன், அதன் பிறகு அதே வீட்டில் எப்போதும் போல சாப்பிட்டுக்கொண்டும், தூங்கிக் கொண்டும் இருந்திருக்கிறார். ஒரு வாரம் கடந்த நிலையில் துர்நாற்றம் வரவேதான் போலீஸில் சரணடைந்தார். அந்த வழக்கில்தான் தற்போது தீர்ப்பு வழங்கப்பட்டிருக்கிறது" என்றனர்.

புதுச்சேரி 3-வது கூடுதல் செசன்ஸ் நீதிமன்றத்தில் நடைபெற்று வந்த இந்த வழக்கில், தாயைக் கொன்ற அமலோற்பவநாதனுக்கு ஆயுள் தண்டனையும், ரூ.5,000/- அபராதமும் விதித்து தீர்ப்பளித்தார் நீதிபதி இளவரசன்.

source https://www.vikatan.com/crime/puducherry-court-has-sentenced-life-time-prison-to-the-son-who-killed-his-mother