சென்னை கிண்டி கத்திப்பாரா அருகே பிரபல நட்சத்திர ஹோட்டல் ஒன்று செயல்பட்டுவருகிறது. நேற்று மாலை, இந்த ஹோட்டலில் உள்ள பாருக்கு ஓர் இளைஞர் வந்திருக்கிறார். அவருக்கு வயது குறைவாக இருந்துள்ளது. அதுமட்டுமின்றி ஏற்கெனவே அவர் அதிக மது போதையில் இருந்திருக்கிறார். இதனால், மது அருந்த அவருக்கு அனுமதி மறுக்கப்பட்டுள்ளதாகக் கூறப்படுகிறது.
கார் விபத்து
இதனால், ஆத்திரமடைந்த அந்த நபர் அங்கிருந்த ஊழியர்களுடன் தகராறு செய்துள்ளார். தனக்கு அனுமதி மறுக்கப்பட்ட ஆத்திரத்தில் அந்த இளைஞர், தான் வந்த காரை வேகமாக இயக்கி ஹோட்டல் கேட் மீது மோதியிருக்கிறார். கார் மோதியதில் கேட் உடைந்து வாகனத்தோடு ரோட்டுக்கு வந்தது. சாலையில் காருடன் கேட் இணைந்திருந்ததால், வாகனங்கள் செல்ல முடியாமல் கடுமையான போக்குவரத்து நெரிசல் ஏற்படத் தொடங்கியது.
சம்பவம் அறிந்து வந்த காவல்துறையினர், காரில் அடிபட்டுக் கிடந்த இளைஞரை மீட்டு மருத்துவமனைக்கு அனுப்பிவைத்தனர். மேலும், அந்த காரையும், கேட்டையும் சாலையிலிருந்து நீக்கி போக்குவரத்தைச் சரிசெய்தனர். ஹோட்டல் ஊழியர்கள் வழங்கிய புகாரில் அடிப்படையில், மருத்துவமனையிலிருந்து இளைஞரிடம் விசாரணை மேற்கொள்ளப்பட்டது.
கார் விபத்து
அந்த காரை ஓட்டியது, முகப்பேர் பகுதியைச் சேர்ந்த 19 வயது கல்லூரி மாணவன் என்பது போலீஸார் விசாரணையில் தெரியவந்துள்ளது. ஏற்கெனவே அளவுக்கு அதிகமான மது போதையில் இருந்ததாலும், வயது குறைவாக இருந்த காரணத்தினாலும், ஹோட்டல் ஊழியர்கள் அவரை பாருக்குள் மது அருந்த அனுமதிக்கவில்லை. அந்த ஆத்திரத்திலும், மது போதையிலும் இப்படிச் செய்திருக்கிறார். அந்த இளைஞரைக் கைதுசெய்து காவல்துறையினர் விசாரணை நடத்திவருகிறார்கள்.
இலங்கையில் கடந்த சில வாரமாக கடும் பொருளாதார நெருக்கடி நிலவி வருகிறது. அதனால் அத்தியாவசிய பொருள்கள் விலை கடுமையக உயர்ந்துள்ளது. எனவே , இலங்கை அரசுக்கு எதிராக எதிர்க்கட்சியினர், மக்கள் தெருவில் இறங்கி போராடி வருகிறார்கள்.
மக்களின் கடும் கொந்தளிப்பால் ஊரடங்கும் போடப்பட்டு ராணுவம் தீவிர ரோந்து பணியில் உள்ளது. இந்த நிலையில், இலங்கை பிரதமர் மஹிந்த ராஜபக்சே தன் பதவியை ராஜினாமா செய்துவிட்டதாக வந்த தகவல் வதந்தி எனவும், தற்போது அப்படி எந்த திட்டமும் இல்லை என்றும் பிரதமர் அலுவலகம் தெரிவித்துள்ளது.
இலங்கை
இதைத் தொடந்து நேற்று நள்ளிரவு நடந்த இலங்கையின் அமைச்சரவை அவசர ஆலோசனைக் கூட்டம் முடிந்து செய்தியாளர்களை சந்தித்த கல்வி அமைச்சர் தினேஷ் குணவர்தன, ``இலங்கை பொருளாதார நெருக்கடி குறித்து விவாதித்த பின்னர், அதிபர் கோத்தபய ராஜபக்சே மற்றும் அவரின் சகோதரரும் பிரதமருமான மஹிந்த ராஜபக்சேவை தவிர ஒட்டுமொத்தமாக 26 அமைச்சர்களும் தங்களது பதவியை ராஜினாமா செய்ய இருக்கிறோம். எங்கள் ராஜினாமா கடிதங்களை சமர்ப்பித்தால் தான் அதிபர் புதிய அமைச்சரவை அமைக்க முடியும் ” எனத் தெரிவித்தார்.
பதவி விலகி உள்ள அமைச்சகளில் ராஜபக்சேவின் சகோதரர்களும் இடம் பெற்றுள்ளது குறிப்பிடத்தக்கது.
தமிழகத்தில் மதுபானக்கடைகளை மூட வேண்டும் என்று பல தரப்பினரும் கோரிக்கை விடுக்கின்றனர். இதையும் கடந்து மதுபானக்கடைகளைத் திறக்க வேண்டுமென்றால் அந்தந்தப் பகுதி மக்களிடம் கருத்தைக் கேட்க வேண்டும் என்று சமூக ஆர்வலர்களிடமிருந்து கோரிக்கைகளும் எழுந்த வண்ணம் உள்ளன. ஆனாலும், மதுபானக்கடைகள் தொடங்கப்படுவது இன்னும் தொடர்ந்துகொண்டுதான் இருக்கிறது. இந்த மதுபானக் கடைகளால் மக்கள் படும் பாடு கொஞ்சம்கூட ஓயவில்லை. இன்னும் பல இடங்களில் டாஸ்மாக் என்னும் மதுபானக் கடைகளுக்கு எதிரான மக்களின் குரல் ஒலித்துக்கொண்டுதான் இருக்கிறது.
டாஸ்மாக் மதுக்கடை
இந்தச் சூழலில்தான், தமிழ்நாடு மது சில்லறை விற்பனை (கடைகள் மற்றும் பார்கள்) விதிகள், 2003-ல், மதுபானக்கடைகள் அமைப்பதற்கான இடம் மற்றும் கடையை மாற்றுவது குறித்த பகுதிகளில் திருத்தம் கொண்டு வந்திருக்கிறது தமிழக அரசு. கடை அமையவிருக்கும் இடம், ஏற்கெனவே உள்ள கடையை இடம் மாற்றுவது ஆகியவை குறித்து பொதுமக்களிடமிருந்து ஆட்சேபனை எதுவும் வரப் பெற்றால், அதைக் கட்டாயமாகக் கருத்தில் கொண்டு தேவைப்படும் முடிவை மாவட்ட ஆட்சியர் எடுக்க வேண்டுமென மேற்கண்ட விதிகளில் 02.03.2022 அன்று திருத்தம் கொண்டு வந்துள்ளது தமிழக அரசு. அதாவது, மதுபானக்கடை அமைவிடம் குறித்த ஆட்சேபனையிருந்தால் சம்பந்தப்பட்ட மாவட்ட ஆட்சியரிடம் கோரிக்கை வைக்க வேண்டும். அதன் பிறகு, இறுதி முடிவை மாவட்ட ஆட்சியர் எடுப்பார் என்றும் சொல்கிறது திருத்தம். இத்தனை ஆண்டுகளில் மாவட்ட ஆட்சியர்களிடம் இதுவரை யாருமே ஆட்சேபனை தெரிவிக்காதது போலவும் இனி ஆட்சேபனை வந்தால் அதை ஆட்சியர் கருத்தில் கொண்டு உடனே முடிவெடுப்பார் என்பது போலவும் சொல்ல வருகிறார்களா இந்தத் திருத்தத்தின் மூலம்?
இது சம்பிரதாயமான விதித் திருத்தம் என்பதைத் தவிர வேறு என்ன? தங்கள் பகுதியில் ஒரு மதுபானக்கடை வேண்டுமா, வேண்டாமா என முடிவெடுக்கும் அதிகாரத்தைக் கிராமப்புறமாக இருந்தால் சம்பந்தப்பட்ட கிராமசபைக்கும், நகர்ப்புறமாக இருந்தால் சம்பந்தப்பட்ட உள்ளாட்சி மன்றத்துக்கும் வழங்குவது குறித்து அரசு பரிசீலிக்க வேண்டும்.
அதிகாரப்பரவல் எதுவரை? எந்த அளவுக்கு நாம் ஒன்றிய அரசிடமிருந்து நமக்கான உரிமைகளைப் பெறுவதில் உறுதியாக செயல்பட வேண்டியது அவசியமோ, அதே உறுதி உள்ளாட்சிகளை வலுப்படுத்துவதிலும் அவற்றுக்கான அதிகாரங்களை உறுதிப்படுத்துவதிலும் இருக்க வேண்டாமா? ஜி.எஸ்.டி நிதிப் பகிர்வாக இருந்தாலும் சரி, கல்வியை மாநிலப் பட்டியலுக்கு மாற்றுவதாக இருந்தாலும் சரி, மாநில ஆளுநரின் அதிகார வரம்புகளை மறுபரிசீலனை செய்வதாக இருந்தாலும் சரி, நம்முடைய நியாயமான கோரிக்கைகளை நாம் அனைவரும் ஒன்றிணைந்து வலியுறுத்துகிறோம். காரணம், ஒன்றிய அரசின் அதிகார குவிப்பு அணுகுமுறையால் அதிகம் பாதிக்கப்பட்ட மாநிலங்களில் தமிழ்நாடும் ஒன்று என்பதால். அதிகார குவிப்பால் அதிகம் பாதிக்கப்பட்ட நாம், அதிகாரப் பகிர்வை செயல்படுத்தும் முன்னோடி மாநிலமாக இருக்க வேண்டாமா? திராவிட மாடலில் உள்ளாட்சிகளுக்கான அதிகாரப்பர்வு என்ற முக்கிய அத்தியாயத்துக்கும் இடம் உண்டுதானே?
மக்களுக்கு பக்கத்திலிருந்து கொண்டு மக்களின் பிரச்னைகளில் நேரடியாகப் பங்கெடுக்கின்ற உள்ளாட்சி மன்றங்களின் முடிவு மற்றும் கிராம சபைகளின் முடிவை மதிப்பதுதான் மாநிலங்களுக்கான அதிகாரப் பகிர்வுக்கான நமது கோரிக்கைக்கு நியாயம் கற்பிப்பதாக இருக்கும்.
உள்ளாட்சி
கிராமசபைக்கு இடமளித்த மாநிலங்கள்
மதுப்பானக்கடைகளை அமைப்பது பற்றி கிராம சபையின் முடிவெடுப்பது என்பது புதிய அணுகுமுறை அல்ல. ஏற்கெனவே மகாராஷ்டிரா, ஹரியானா போன்ற மாநிலங்களில் மதுப்பானக்கடைகள் அமைப்பு குறித்து கிராம சபையின் ஒப்புதல் பெறுவது என்பது சட்டப்படி அமைந்திருக்கிற ஒன்றுதான்.
நம்பிக்கையான காலகட்டம்
1996 முதல் 2001 வரையிலான காலகட்டம், தமிழகத்தில் உள்ளாட்சிகளுக்கான ஒரு முக்கியமான காலகட்டமாக இருந்தது. முன்னாள் முதல்வர் கருணாநிதியும் அன்றைய உள்ளாட்சித்துறை அமைச்சர் கோ.சி.மணியும் உள்ளாட்சிகளை வலுப்படுத்தப் பல முயற்சிகளை எடுத்திருக்கிறார்கள். குறிப்பாக, எல்.சி.ஜெயின் என்ற வல்லுநரைக் கொண்டு மூன்றடுக்கு ஊராட்சிகளுக்கான உரிய அதிகாரங்களை வழங்குவது குறித்த அறிக்கைத் தயாரிக்கப்பட்டு தமிழகச் சட்டமன்றத்தில் சமர்ப்பிக்கப்பட்து மிக முக்கிய ஒரு வரலாற்றுப் பணி.
கருணாநிதி
பதவி நீக்கம் செய்யப்பட்ட ஓர் ஊராட்சித் தலைவருக்குக் கிராமசபை மூலம் நீதி கிடைத்ததும் இந்தக் காலகட்டத்தில்தான்.
திருவள்ளூர் மாவட்டம், பூந்தமல்லி ஒன்றியம், குத்தம்பாக்கம் என்ற கிராமத்தில் பதவி நீக்கம் செய்யப்பட்டார் ஊராட்சி தலைவர் இளங்கோ. நேர்மையாகத் தான் செய்த பணிகள், தவறாக ஒரு சில அலுவலர்களால் கணக்கிடப்பட்டு முறைகேடு செய்தாகக் குற்றம்சாட்டப்பட்டு பதவி நீக்கம் செய்யப்பட்டுள்ளேன் என்றும் என் பணிகள் நேர்மையாகச் செய்து முடிக்கப்பட்டவை என என்னால் நிரூபிக்க முடியும் எனவும் ஊடகங்கள் மூலம் தெரிவித்திருந்தார். அதை அறிந்த அப்போதைய முதல்வர் கருணாநிதி, அக்கிராமத்தில் கிராமசபையைக்கூட்டி மக்களின் கருத்தைக் கேட்டுச் சம்பந்தப்பட்ட அலுவலர்கள் முடிவெடுக்க வேண்டும் என உத்தரவிட்டார்.
கிராமசபை கூடியது. ஊராட்சியில் மேற்கொள்ளப்பட்ட பணிகள் சிறப்பாக உள்ளன என்பது கண்டறியப்பட்டதோடு, பதவி நீக்கம் செய்யப்பட்டிருந்த இளங்கோ மீண்டும் அதே கிராமசபையில் ஊராட்சித் தலைவராகப் பொறுப்பேற்ற வரலாறு தமிழகத்தில் உண்டு. இது நடந்து 1997-ல்.
கிராமசபை மீது அன்று தமிழக அரசு எடுத்த முடிவு மிகச் சரியான முக்கியமான முடிவு. மக்கள் நலப் பணிகளை ஆய்வு செய்து தீர்ப்பு அளிக்கக்கூடிய ஒரு களமாகக் கிராமசபை இருக்க முடியும் என நம் தமிழகத்திலேயே ஒரு முன்னுதாரணம் இருக்கும்போது, ஏன் மதுபானக்கடைகள் குறித்த முடிவு எடுக்கக்கூடிய வாய்ப்பு கிராம சபைக்கு வழங்கக் கூடாது?
திராவிட முன்னேற்றக் கழகம் 2019-ம் ஆண்டு நாடாளுமன்றத் தேர்தலில் `ஊராட்சி சபை’ என்றும், 2021 சட்டமன்றத் தேர்தலில் `மக்கள் கிராமசபை’ என்றும் தமிழகம் முழுவதும் தேர்தல் பரப்புரைகளை மேற்கொண்டதை நாம் அறிவோம். குறிப்பாக, இன்றைய முதல்வரும் அன்றைய திராவிட முன்னேற்றக் கழகத்தின் தலைவருமான மு.க.ஸ்டாலின் பல இடங்களுக்குப் பயணித்துப் பரப்புரை மேற்கொண்ட அதே கிராமசபைகளை வலுப்படுத்த வேண்டும் என்றுதான் மக்கள் கேட்கிறார்கள்.
உரிய சட்டத் திருத்தத்தின் மூலம் மதுபானக்கடைகள் குறித்து முடிவெடுக்கக் கிராமசபைகளுக்கும் நகர்ப்புற உள்ளாட்சிகளுக்கும் தமிழக அரசு அதிகாரமளிக்க வேண்டும் என்பதே எங்கள் கோரிக்கை. அதிகாரம் அளிக்கப்பட்டால் மட்டுமே மீண்டும் உள்ளாட்சிகளுக்கான நல்ல காலம் பிறக்கும்.
தேசிய அளவில் காங்கிரஸ் கட்சியின் செல்வாக்கு குறைந்து வருவதால், அந்த இடத்தை பிடிக்க திரிணாமுல் காங்கிரஸ் தலைவர் மம்தா பானர்ஜி, ஆம் ஆத்மி கட்சியின் அர்விந்த் கெஜ்ரிவால் ஆகியோர் போட்டி போடுகின்றனர். இது தவிர தெலங்கானா முதல்வர் சந்திரசேகர் ராவும் எதிர்க்கட்சிகளை ஒன்றிணைக்கும் பணியில் ஈடுபட்டுள்ளார். 2024-ம் ஆண்டு நடக்க இருக்கும் மக்களவைத் தேர்தலில் பாஜக-வை எதிர்கொள்ள எதிர்க்கட்சிகள் ஒன்று சேரவேண்டும் என்ற கோரிக்கை எழுந்துள்ளது. மம்தா பானர்ஜி ஒரு புறமும், சந்திரசேகர் ராவ் ஒரு புறமும் எதிர்க்கட்சித்தலைவர்களை சந்தித்து பேசி வருகிறார்கள். இதில் காங்கிரஸ் உட்பட அனைவரும் ஏற்றுக்கொள்ளக்கூடிய ஒருவரை ஐக்கிய முற்போக்கு கூட்டணி தலைவராக நியமிக்கவேண்டும் என்ற கோரிக்கை எழுந்துள்ளது.
இக்கோரிக்கைக்கு சிவசேனாவும் ஆதரவு தெரிவித்துள்ளது. மகாராஷ்டிரா முதல்வர் உத்தவ் தாக்கரே இதில் சரத்பவார் அப்பதவிக்கு வரவேண்டும் என்று விருப்பம் தெரிவித்துள்ளார். அதோடு மம்தா பானர்ஜியும் சரத்பவாரை சந்தித்து பேசிய போது மூத்த தலைவர் என்ற முறையில் பாஜகவுக்கு எதிராக உருவாக்கப்படும் அணிக்கு தலைமை தாங்கவேண்டும் என்று சரத்பவாரிடம் கேட்டுக்கொண்டார்.
மம்தா பானர்ஜி
தற்போது ஐக்கிய முற்போக்கு கூட்டணிக்கு சோனியா காந்தி தலைவராக இருக்கிறார். ஆனால் காங்கிரஸ் கட்சியால் எதிர்க்கட்சி அணிக்கு தலைமை தாங்க முடியுமா என்ற சந்தேகம் ஏற்பட்டுள்ளது.
சரத்பவாருக்கு ஆதரவாக தீர்மானம்
சமீபத்தில் தேசியவாத காங்கிரஸ் கட்சியின் இளைஞரணி கூட்டத்தில் சரத்பவார் ஐக்கிய முற்போக்கு கூட்டணிக்கு தலைமை தாங்கவேண்டும் என்று கோரி தீர்மானம் நிறைவேற்றப்பட்டது. இது குறித்து சரத்பவாரிடம் கேட்டதற்கு, தனக்கு அப்பதவியை ஏற்கும் திட்டம் இல்லை என்று தெரிவித்துள்ளார்.
இது தொடர்பாக அவர் அளித்துள்ள பேட்டியில், ``எங்களது கட்சியின் இளைஞரணியினர் என்னை ஐக்கிய முற்போக்கு கூட்டணி தலைவர் பதவியேற்கும் படி கூறி தீர்மானம் நிறைவேற்றினர். ஆனால் எனக்கு அதில் ஆர்வம் இல்லை. அப்பதவிக்கு வர விரும்பவில்லை. பொறுப்புக்களை ஏற்க விரும்பவில்லை. பாஜகவிற்கு எதிராக மாற்று அணியை உருவாக்க முயன்றால் அதற்கு ஒத்துழைப்பு கொடுக்க, ஆதரவு கொடுக்கவும், வலு சேர்க்கவும் தயாராக இருக்கிறேன். அரசியல் கட்சிகளுக்கு ஒவ்வொரு மாநிலத்திலும் அதிகார மையங்கள் இருக்கலாம். எதிர்க்கட்சி கூட்டணி உருவாக்கப்பட்டால் அது காங்கிரஸ் இல்லாமல் உருவாக்க முடியாது.
காங்கிரஸுக்கு பவார் ஆதரவு
காங்கிரஸ் கட்சிக்கு ஒவ்வொரு கிராமம், மாவட்டம் மற்றும் மாநிலத்தில் தொண்டர்கள் இருக்கின்றனர். எனவே பாஜகவிற்கு எதிரான அணியை உருவாக்கும் போது காங்கிரஸ் கட்சியையும் சேர்த்துக்கொள்ளவேண்டும். காங்கிரஸ் கட்சி ஆட்சியில் இல்லாவிட்டாலும், நாடு முழுவதும் அதற்கு செல்வாக்கு இருக்கிறது. அதனை கவனத்தில் கொண்டு அரசியல் கட்சிகள் செயல்படவேண்டும். அப்படி செயல்பட்டால் மாற்று அணியை உருவாக்குவதில் சிக்கல் இருக்காது.
சரத் பவார் - உத்தவ் தாக்கரே
எதிர்க்கட்சிகள் ஒன்றிணையவேண்டுமானால் உண்மை நிலையை புறக்கணிக்க முடியாது. நாட்டில் ஒரே ஒரு கட்சி வலுவானதாக இருந்தால் புதின் போன்ற நிலைதான் ஏற்படும். புதின் மற்றும் சீனா அதிபர்கள் சாகும் வரை தங்களது நாட்டிற்கு தலைமை தாங்குவார்கள். அது போன்ற ஒருவர் இந்தியாவுக்கு வரமாட்டார் என நம்புகிறேன்" என்று தெரிவித்தார். ஐக்கிய முற்போக்கு கூட்டணியின் தலைவர் பதவியை சரத்பவார் ஏற்க மறுத்திருப்பது குறித்து தேசியவாத காங்கிரஸ் கட்சியின் இளைஞரணித்தலைவர் ரவிகாந்த் கூறுகையில், ``எங்கள் தலைவர் முடியாது என்று சொன்னாலும், உங்கள் ஒருவரால் மட்டுமே அனைவரையும் ஒரே அணியில் கொண்டு வர முடியும் என்று கூறி அப்பதவியை ஏற்றுக்கொள்ள வலியுறுத்துவோம்" என்று தெரிவித்தார்.
ஐ.பி.எல்லைப் பொருத்தவரை எல்லா முறையும் செட்டிலான அணியோடு தீர்க்கமாய் களமிறங்குவது சென்னை அணிதான். கிட்டத்தட்ட ஏலத்தின்போதே 'இனி நீ டேவிட் இல்ல, டிராவிட்டு, நீ ரவி மேஸ்திரி இல்ல, ரவி சாஸ்திரி' என ஒவ்வொரு வீரரின் ரோலும் அணியில் முடிவு செய்யப்பட்டுவிடும். இப்படிப் பல வாரங்களுக்கு முன்பே திட்டமிடப்பட்டுவிடுவதன் பலனை இதற்கு முன்னால் பார்த்திருக்கிறோம் - கோப்பைகளை வெல்வதன் மூலம். இந்தத் திட்டமிடலுக்கு ஒரு நெகட்டிவ் பக்கமும் இருக்கிறது, இந்த சீசனின் முதல் இரண்டு ஆட்டங்களைப் போல.
பவர்ப்ளேயில் எதிரணியின் டாப் ஆர்டரை தீபக் வழியே திருப்பியனுப்பி மிடில் ஆர்டரை ஜடேஜா, மொயின் வழியே சமாளித்து டெத் ஓவர்களை ஸ்பெஷலிஸ்ட் ப்ராவோ வழியே முடிப்பதுதான் கேம் ப்ளான். ஆனால் சஹாரின் இல்லாமை இந்த மொத்த ப்ளானையும் சிதறடிக்க விளைவாக ப்ளேயிங் லெவனிலும் நிலையற்றத் தன்மை. தொடர் வரலாற்றில் இல்லாத அளவிற்கு முதல் இரண்டு போட்டிகளிலும் தோல்வி, பவர்ப்ளேயின் 12 ஓவர்களில் ஒரு விக்கெட் கூட வீழ்த்தாதது என மோசமான ரெக்கார்ட்கள்.
CSK vs PBKS
மூன்றாவது போட்டியிலும் ப்ளேயிங் லெவனில் மாற்றம் இருந்தது. துஷார் தேஷ்பாண்டேக்கு பதில் உடல்நலம் தேறிவந்துள்ள ஜோர்டன். பஞ்சாப்பில் ராஜ் பவாக்குப் பதில் ஜித்தேஷ் சர்மா, ஹர்ப்ரீத் ப்ராருக்குப் பதில் இன்ஸ்விங் கில்லி என உள்ளூர் வட்டாரத்தில் பாராட்டப்படும் வைபவ் அரோரா.
'டாஸாவது ஜெயிங்க' என காயின் நினைத்ததோ என்னவோ சென்னைக்குச் சாதகமாய் விழுந்தது. ட்விஸ்ட்டே இல்லாமல் பௌலிங்கைத் தேர்வு செய்தார் ஜடேஜா. கடைசியாய் நான்கு நாள்கள் முன்பு சென்னை லக்னோவுடன் மோதிய அதே ப்ரபோர்ன் மைதானம்தான். இந்த மூன்று நாள்களாக இரவுநேரம் அங்கே தேங்கிய தண்ணீரை எல்லாம் பக்கத்தூர் வயல் விளைச்சல்களுக்கு திருப்பிவிட்டிருப்பதாகக் கேள்வி. அதனால் பெரிதாக நீரும் இல்லை. பனியும் முன்பு போலில்லை.
ஓப்பனிங் இறங்கினார்கள் மயாங்க் அகர்வாலும் தவானும். பேன்டஸி லீக்கில் மயாங்க் மேல் நம்பிக்கை வைத்து அணியில் எடுக்கும்போது அவர் சட்டென நடையைக் கட்டிவிடுவார். யாருமே எதிர்பார்க்காதபோது இறங்கி வெளுப்பார். இந்த ஆட்டத்தில் ஏராளம் பேர் டீமில் எடுத்திருப்பார்கள் போல. முதல் பந்தில் பவுண்டரி தட்டிவிட்டு அடுத்த பந்திலேயே கவரில் சிம்பிளாய் கேட்ச் கொடுத்துவிட்டு வெளியேறினார்.
CSK vs PBKS
'நடிச்சா ஹீரோ, அடிச்சா சிக்ஸு' மோடில்தான் பிட்ச்சுக்கே வருகிறார் பனுக்கா ராஜபக்ஷே. ஜோர்டன் வீசிய இரண்டாவது ஓவரின் முதல் பந்தே வானத்தைத் தொட்டுவிட்டு வந்தது. அடுத்த பந்தில் என்ன நினைத்தாரோ தட்டிவிட்டு ஓடிவர, பாதிவழியில் திருப்பியனுப்பினார் தவான்.
'தனியே மேய்ந்துகொண்டிருக்கிறது இந்த மான்' என நாம் நினைத்துக்கொண்டிருக்கும்போதே சட்டென பாய்ந்து வருமே ஒரு சிங்கம், அப்படித் திடீரென ப்ரேமுக்குள் வந்தார் தோனி. ஜோர்டன் எறிந்த பந்தை பிடித்து மின்னல்வேகத்தில் ஸ்டம்ப்பிற்குத் திருப்பி ஒரு ரன் அவுட். மற்றுமொரு முறை 'தல நாஸ்டாலஜியா' நினைவுகளுக்குள் சென்றுவந்தார்கள் பார்த்தவர்கள்.
'பவர்ப்ளேல விக்கெட்டு வந்துடுச்சு, விக்கெட்டு வந்துடுச்சு' என குதித்த சென்னை ரசிகர்களைக் கடைக்கண்ணால் பார்த்தபடி இறங்கினார் லிவிங்ஸ்டன். மற்ற டி20 லீக்குகளைப் பொருத்தவரை இந்த லிவிங்ஸ்டன் நம்மூர் 'வானத்தைப் போல', 'சிவாஜி' ஹிட் படங்களில் கெஸ்ட் ரோலில் வரும் லிவிங்ஸ்டன் போலத்தான். கண்டிப்பாய் ஹிட். ஆனால் ஐ.பி.எல்லைப் பொருத்தவரை அதே நம்மூர் லிவிங்ஸ்டன் ஹீரோவாய் நடித்த படங்களைப் போல. ம்ஹும்! 'வரலாற்றை மாற்றியெழுதுகிறேன் தோழர்' என மட்டையைப் பிடித்து அவர் சுழற்றியதில் சிதறின சிக்ஸர்கள். முகேஷ் சௌத்ரி வீசிய ஐந்தாவது ஓவரில் மட்டும் 26 ரன்கள். அடுத்துவந்த ஜடேஜா பந்தையும் சிக்ஸருக்குத் தூக்க விறுவிறுவென ஏறியது ஸ்கோர். போதாக்குறைக்கு கைக்கு வந்த கேட்ச்சை வேறுவிட்டார் ராயுடு.
CSK vs PBKS
சமீப காலமாக பௌலிங்கில் மிரட்டும் ப்ரிட்டோரியஸைத்தான் திரும்பவும் ஜடேஜா அழைத்துவர வேண்டியதாய் இருந்தது. அவர் ரன்ரேட்டைக் கட்டுபடுத்த மற்ற பௌலர்களை டார்கெட் செய்யவேண்டிய நெருக்கடி பேட்ஸ்மேன்களுக்கு. ப்ராவோவை தவான் குறிவைக்க கப்பென கேட்ச் பிடித்து வெளியே அனுப்பினார் ஜடேஜா. அடுத்த ஓவரிலேயே விட்டதை அதே ஜடேஜா பந்தில் பிடித்தார் ராயுடு. லிவிங்ஸ்டனும் காலி. 11 ஓவர்கள் முடிவில் பஞ்சாப் நான்கு விக்கெட் இழப்பிற்கு 115 ரன்கள் எடுத்திருந்தது.
களத்தில் ஜித்தேஷ், ஷாரூக் என இரண்டு புதிய பேட்ஸ்மேன்கள். தன்னைப் பற்றிய ஹைப் எல்லாம் நிஜம்தான் என்பதைப் போல மடங்கி நின்று ஒரு சிக்ஸ் அடித்தார் ஜித்தேஷ், அந்த ஒரு ஷாட் அவரின் கான்பிடன்ஸை சென்னை பௌலர்களுக்குச் சொல்லியது. மற்றொரு சீனியரான ஜடேஜாவையும் சூப்பராக எதிர்கொண்டார் ஜித்தேஷ். மீண்டும் ஆபத்பாந்தவான் ப்ரிட்டோரியஸ் வந்துதான் காப்பாற்ற வேண்டியதாய் இருந்தது. வித்தியாசமாய் ரிவர்ஸ் ஸ்கூப் அடிக்க முயன்று ஜித்தேஷ் அவுட்டாக, அவரின் குட்டி கேமியோவால் ஸ்கோர் 150-ஐ நெருங்கியிருந்தது.
பினிஷர் ரோலில் களமிறங்கும் ஷாரூக்கிற்கு ஸ்ட்ரைக் ரொட்டேட் செய்யவேண்டிய வேலையும் சேர்த்து! 'ஸாரி, அதெல்லாம் பழக்கமில்ல' என அடுத்த ஓவரில் அவரும் நடையைக் கட்ட, தத்தளித்தது ஸ்கோர் போர்டு.
CSK vs PBKS
ஸ்ட்ரீட் கிரிக்கெட் ஆடும் அத்தனை டீமிலும் இப்படி ஒரு கேரக்டர் இருக்கும். பந்தை அடிக்க முழு உடலையும் செலுத்தி அதை நோக்கிப் பாய்வார்கள். அவர்களுக்கு சிக்ஸர் மட்டுமே ரன்கள். ஒன்று, இரண்டு எல்லாம் அவர்கள் கணக்கிலேயே இருக்காது. இந்த கேரக்டரின் சர்வதேச வெர்ஷன்தான் ஒடியன் ஸ்மித். பந்தை குறுக்க மறுக்காக அடிக்க விரட்டி விரட்டி சோர்ந்து போய் கேட்ச் கொடுத்து வெளியேறினார். அதன்பின் ராகுல் சஹாரும் ரபாடாவும் சம்பிரதாய ஆட்டங்களை ஆட, ஸ்கோர் தட்டுத் தடுமாறி 180-ஐ தொட்டு நின்றது. கடைசி 54 பந்துகளில் வெறும் 65 ரன்கள்தான்.
'இரண்டு மேட்ச்லயும் சொதப்பிய பௌலிங்கிலேயே தேறிட்டோம். பேட்டிங்தானே... பத்து பேரு இருக்காங்க. பாத்துக்கலாம் விடு' என இடைத்தேர்தலை அணுகும் ஆளுங்கட்சி போல அசால்ட்டாக இருந்தது சென்னை முகாம். ஆரம்பத்திலேயே அதிர்ச்சியளித்தது பஞ்சாப். வழக்கம்போல 'இன்னும் என் டைம் வரல' என மோசமாக அவுட்டாகி நடையைக் கட்டினார் ருத்துராஜ். கடந்த மூன்று மேட்ச்களிலும் சரியாக நான்காவது பந்தில் அவுட்டாகி வெளியேறி இருக்கிறார் ருத்து.
வழக்கமாய் இப்படி ருத்து சொதப்பினால் மறுமுனையில் நங்கூரமாய் ஊன்றி நிற்பார் டுப்ளெஸ்ஸி. இப்போது அதேயளவு அனுபவமிருக்கும் உத்தப்பா அப்படி நிற்பார் என எல்லாரும் எதிர்பார்க்க, வைபவ்வின் இன்ஸ்விங்கிற்கு அவுட்டாகி வெளியேறினார். சென்னை கடந்த சீசனில் ஆதிக்கம் செலுத்த டாப் ஆர்டரில் ஆடிய மூன்று பேரின் பங்களிப்பு முக்கியக் காரணம். இந்த முறை மூன்றாவது ஆளான மொயினும் வைபவ்வின் ஸ்விங்கைக் கணிக்க முடியாமல் போல்டாக, மொத்த சுமையும் மிடில் ஆர்டர் மேல் விழுந்தது.
கேப்டன் என்கிற பொறுப்போடு களமிறங்கினார் ஜடேஜா. ஆனால் சரியாக மூன்றே பந்துகள். அர்ஷதீப்பின் லென்த் பாலில் ஸ்டம்ப் தெறித்தது. முந்தைய பேட்ஸ்மேன் அவுட்டாகி பெவிலியன் போய் பேடைக் கழற்றுவதற்குள் அடுத்த பேட்ஸ்மேன் அவுட்டாகி கூடவே வந்த அந்த வேகம்... கிலியில் முழி பிதுங்கியது மஞ்சள் படைக்கு!
CSK vs PBKS
ராயுடுவோடு ஜோடி சேர்ந்தார் தூபே. இப்படியான தருணங்களில் நிதானமாக ஆடி கடைசி ஐந்தாறு ஓவர்களில் அட்டாக் ஆடுவார் ராயுடு. அனுபவம் அப்படி. 'அப்படியா நினைச்சீங்க? தப்பாச்சே' என ஒடியன் பந்தைத் தடுமாறித் தொட்டு கேட்ச் கொடுத்து அவரும் வெளியேற, எண்ட் கார்டை அப்போதே எழுதத் தொடங்கிவிட்டார்கள் ரசிகர்கள். 'என்னய்யா சும்மா சும்மா என்னைக் க்ரீஸுக்கு கொண்டுவந்துடுறீங்க?' என சலித்தபடி வந்தார் தல.
ஷிவம் தூபே - கடந்த மேட்ச்சின் ஹீரோவும் இவரே, வில்லனும் இவரே! இந்த முறை ஹீரோ மட்டுமே. புட்வொர்க்கே இல்லாத பேட்டிங் ஸ்டைல் தூபேவினுடையது. அதனால் லெக் ஸ்பின்னர் சஹாரை தன்மையாக சமாளித்து, ஸ்மித், ரபாடா போன்ற பாஸ்ட் பௌலர்களின் வேகத்தையே தனக்குச் சாதகமாக்கி பந்தை விரட்டி ஸ்கோரை முடிந்தளவிற்கு ஏற்றிக்கொண்டிருந்தார். மறுமுனையில் தோனிதான். ஆனால் 2019 வரை நாம் பார்த்த தோனி நிச்சயம் இவரில்லை என்பதால் தூபே என்னும் ஒற்றைக் கயிற்றில் தொங்கிக்கொண்டிருந்தது சி.எஸ்.கேவின் வெற்றி.
பத்து ஓவர்கள் முடிவில் ஸ்கோர் 53/5. அடுத்த மூன்று ஓவர்களிலும் பெரிதாக ரன்கள் வந்துவிடவில்லை. ரபாடா வீசிய 14வது ஓவரில் 18 ரன்களை குவித்தார் தூபே. 26 பந்துகளில் அரைசதம். 'ஆஹா... ஒளி வந்துவிட்டது' என சட்டையைக் கழற்றிச் சுற்றினார்கள் ரசிகர்கள். 'இந்தா ப்யூஸ் கட்டையைப் பிடுங்கிவிடுறேன்' என முதல் பந்தில் தூபேவையும் அடுத்த பந்தில் ப்ராவோவையும் வெளியே அனுப்பி ஆட்டையைக் கலைத்தார் லிவிங்ஸ்டன். 'உங்களை அடிக்கவிட்டதுக்கு நீங்க காட்டுற நன்றிக்கடன் இதுதானா கோப்ப்ப்பால்' எனக் கேட்டு மாய்ந்து போனார்கள் ரசிகர்கள்.
CSK vs PBKS
'அடுத்த ப்ராவோ' எனக் கணிக்கப்பட்ட ப்ரிட்டோரியஸும் நான்கே பந்துகளில் நடையைக் கட்ட, சம்பிரதாயத்துக்கு அடிக்கும் பவுண்டரி, சிக்ஸரை அடித்து கீப்பர் ஜித்தேஷின் சூப்பரான அப்பீலால் அவுட்டானார் தோனி. மீதமிருந்த ஒரு விக்கெட் கடைசியாக சஹாருக்கு போனஸ். 54 ரன்கள் வித்தியாசத்தில் வென்று தம்ஸ் அப் காட்டியது பஞ்சாப். மேன் ஆப் தி மேட்ச் சந்தேகமே இல்லாமல் பேட்டிங் - பௌலிங் என இரண்டிலும் கலக்கிய லிவிங்ஸ்டன்தான்.
தோனி இதற்கு மேலும் பேட்டிங்கில் ஆட்டத்தைத் தீர்மானிக்கும் சக்தி இல்லை. கோர் டீமில் ஒருவரான தீபக் சஹார் அணியிலேயே இல்லை. ருத்துராஜ், ஜடேஜா ஆகிய மற்ற இருவரும் (இந்த பார்ம் தொடரும்பட்சத்தில் வருங்காலத்தில் தூபேக்கும் கோர் அணியில் இடமுண்டு) க்ளிக்கானால் மட்டுமே இந்த சீசனில் சி.எஸ்.கே ப்ளே ஆப் வாய்ப்பை நினைத்துப் பார்க்கவாவது முடியும். கிட்டத்தட்ட டுப்ளெஸ்ஸி போலவே தேவைக்கேற்ப கியரை மாற்றி ஆடக்கூடிய கான்வேயின் இடத்தில் முழுக்க முழுக்க அட்டாக் மோடில் ஆடும் உத்தப்பாவை இறக்கும்பட்சத்தில் மிடில் ஆர்டரின் மேல் சுமை ஏறுவதை தவிர்க்கவே முடியாது. ஆனால் அந்தப் பொறுப்பைத் தாங்குவதில்தான் ஏகத்துக்கும் தடுமாற்றம் தெரிகிறது ஜடேஜாவிடம்.
CSK vs PBKS
"ருத்துராஜ் அபாரமான பிளேயர். அவருக்கு நம்பிக்கையளிக்க வேண்டிய இடத்தில் நாங்கள் இருக்கிறோம்" என இந்த ஆட்டம் முடிந்தபின் சொன்னார் ஜடேஜா. அதுசரி, கேப்டனுக்கே இப்போது தேவையாய் இருக்கும் தன்னம்பிக்கையை யார் அளிப்பார்கள்?
