Tamil News Update

புதன், 24 ஜனவரி, 2024

கார்ட்டூன்: நமக்கு நாமே திட்டம்..!

source https://www.vikatan.com/government-and-politics/cartoon-january-31-2024

செவ்வாய், 23 ஜனவரி, 2024

போயஸ் கார்டன் வேதா இல்லம் எதிரில்... பிரமாண்ட புது வீடு - சசிகலா வீட்டு கிரகப்பிரவேசம் | Photo Album

source https://www.vikatan.com/trending/sasikalas-poes-garden-house-warming-celebration

Tamil News Live Today: ஏறுதழுவுதல் அரங்கத்தை திறந்து வைக்கிறார் முதல்வர் ஸ்டாலின் - கீழக்கரையில் முதல் ஜல்லிக்கட்டு!

கீழக்கரை ஏறுதழுவுதல் அரங்கம் - இன்று திறந்து வைக்கிறார் முதல்வர் ஸ்டாலின்!

மதுரை அலங்காநல்லூர் அருகே கீழக்கரை கிராமத்தில் பிரமாண்ட ஏறுதழுவுதல் அரங்கம் கட்டப்பட்டுள்ளது. இதற்கு கலைஞர் நூற்றாண்டு ஏறுதழுவுதல் அரங்கம் என பெயரிடப்பட்டுள்ளது. இதனை தமிழ்நாடு முதல்வர் ஸ்டாலின் இன்று திறந்து வைக்கிறார். வாடிவாசல், ஒரே நேரத்தில் 5,000 பார்வையாளர்கள் அமர்ந்து காணும் வசதிகளுடன் மூன்றடுக்குப் பார்வையாளர் மாடம், ஏறுதழுவுதல் நடைபெறும் இடம், மிக முக்கிய விருந்தினர்கள் அமரும் இடம், அருங்காட்சியகம், என பல்வேறு வசதிகளுடன் இந்த அரங்கம் தயாரகி உள்ளது.

திறப்பு விழாவோடு ஏறுதழுவுதல் அரங்கில் முதல் ஜல்லிக்கட்டு நடைபெறுகிறது. முதல் ஜல்லிக்கட்டில் 500 காளைகளும், 300 மாடுபிடி வீரர்களும் பங்கேற்கின்றனர். முதலிடத்தை பிடிக்கும் சிறந்த காளை மற்றும் சிறந்த மாடுபிடி வீரருக்கு தலா ஒரு தார் ஜீப் வழங்கப்படுகிறது. இரண்டாம் இடத்தை பிடிக்கும் சிறந்த காளை மற்றும் சிறந்த மாடுபிடி வீரருக்கு தலா ஒரு இரு சக்கர வாகனம் வழங்கப்படுகிறது.

இதனை தொடர்ந்து மாதாமாதம் இந்த அரங்கில் ஜல்லிக்கட்டு போட்டிகள் நடத்த திட்டமிடப்பட்டுள்ளதாவும் இதன் மூலம் சுற்றுலா பயணிகளின் வருகையும் அதிகரிக்கும் எனவும் நம்பிக்கை தெரிவிக்கிறது அரசு.

source https://www.vikatan.com/government-and-politics/tamil-news-live-today-live-updates-dated-24-01-2024

`23 ஆண்டுகளுக்குப் பிறகு மாநில மகளிர் கொள்கை...' - தமிழக அமைச்சரவைக் கூட்டத்தின் ஹைலைட்ஸ்

தலைமைச் செயலகத்தில் முதல்வர் ஸ்டாலின் தலைமையில் அமைச்சரவைக் கூட்டம் நேற்று நடைபெற்றது. முன்னதாக இதில் அமைச்சர்கள் அனைவரும் கலந்துகொள்ள வேண்டும் என அழைப்பிதழ் அனுப்பி வைக்கப்பட்டிருந்தது. அதன்படி அனைவரும் கலந்துகொண்டனர். வனத்துறை அமைச்சர் மதிவாணன் மட்டும் பங்கேற்கவில்லை. உடல்நலக் குறைவால் அவர் கோவை மருத்துவமனையில் சிகிச்சையில் அனுமதிக்கப்பட்டிருப்பது குறிப்பிடத்தக்கது. திட்டமிட்டபடி காலை 11 மணிக்குத் தொடங்கிய கூட்டத்தில் தொழில்துறை, சமூகநலத்துறை மற்றும் கலால்துறை சார்பில் பல்வேறு முக்கிய முடிவுகள் எடுக்கப்பட்டன. குறிப்பாக, மாநில மகளிர் கொள்கைக்கு அமைச்சரவையில் ஒப்புதல் அளிக்கப்பட்டுள்ளது.

இது குறித்து நம்மிடம் பேசிய கோட்டை விவரப்புள்ளிகள் சிலர், "ஒவ்வோர் ஆண்டும் ஜனவரியில் சட்டப்பேரவைக் கூட்டம் நடைபெறும். ஆனால் இந்த முறை உலக முதலீட்டாளர்கள் மாநாடு, பிரதமர் மோடியின் தமிழகம் வருகை, முதல்வர் மு.க.ஸ்டாலின் வெளிநாட்டு பயணம் போன்றவற்றால் தாமதமானது. இந்தச் சூழலில்தான் அமைச்சரவைக் கூட்டம் கூட்டப்பட்டது. அப்போது அடுத்த மாதம் நடக்கும் சட்டப்பேரவைக் கூட்டத்தொடர், தொழில்துறை, சமூகநலத்துறை மற்றும் கலால்துறைகளின் சார்பில் பல்வேறு முக்கிய முடிவுகள் எடுக்கப்பட்டன.

குறிப்பாக கடந்த ஆண்டு ஆளுநர், தமிழக அரசு தயாரித்து வழங்கிய உரையை மாற்றி வாசித்த சம்பவம் நடந்தது. எனவே இந்த முறை ஆளுநர் உரையில் இடம்பெற வேண்டிய முக்கிய அம்சங்கள் குறித்து விவாதிக்கப்பட்டது. மேலும் பிப்ரவரி 1-ம் தேதி மத்திய அரசு தனது இடைக்கால பட்ஜெட்டை தாக்கல் செய்ய உள்ள நிலையில்... விரைவில், மக்களவைத் தேர்தலும் அறிவிக்கப்பட உள்ளது. எனவே தமிழக அரசும் பிப்ரவரி மாதத்திலேயே தனது 2024-25-ம் நிதி ஆண்டுக்கான பட்ஜெட்டை தாக்கல் செய்வதற்கான முன்னேற்பாட்டில் உள்ளது. அதற்கான தயாரிப்புகள் குறித்து விவாதிக்கப்பட்டது.

இதனைத் தொடர்ந்து சமூக நலன் மற்றும் மகளிர் உரிமைத்துறை அமைச்சர் கீதா ஜீவன் தலைமையிலான குழு தயாரித்த மாநில மகளிர் கொள்கைக்குத் ஒப்புதல் அளிக்கப்பட்டது. அதில், 'அரசு, தனியார் துறையில் பெண்களுக்கு உரிய முக்கியத்துவம், 100 நாள்கள் வேலைத் திட்டத்தைக் கூடுதலாக 50 நாள்கள் நீட்டிப்பு செய்வது, பள்ளி, கல்லூரிகளில் பெண்களுக்கு தற்காப்புக் கலைகள் பயிற்சி வழங்குதல், 19 வயது வரையிலான இளம்பெண்களுக்கு கஸ்தூரிபா காந்தி பாலிகா வித்யாலயா திட்டம் விரிவுபடுத்துதல், சுகாதாரத்தை மேம்படுத்துதல், பாலின பாகுபாடுகளை கலைதல், அரசு, தனியார் நிறுவனங்களில் உள்ள தலைமை பொறுப்புகளில் பெண்களுக்கு சம உரிமை வழங்குதல்' உள்ளிட்ட அம்சங்கள் இடம்பெற்றிருக்கின்றன.

2001-ல் தேசிய மகளிர் கொள்கை அறிவிக்கப்பட்டது. 23 ஆண்டுகளுக்குப் பிறகு மாநில மகளிர் கொள்கை தமிழகத்தில் அறிவிக்கப்பட்டுள்ளது. முதல்வர் ஸ்டாலின் வரும் 27-ம் தேதி ஸ்பெயின் செல்கிறார். பிப்.12-ம் தேதி தமிழகம் திரும்புகிறார். முதல்வருடன் தொழில்துறை அமைச்சர் டி.ஆர்.பி.ராஜா, தொழில்துறை செயலாளர் உள்ளிட்டோர் செல்கின்றனர். இந்தப் பயணத்துக்கும் அமைச்சரவையில் ஒப்புதல் அளிக்கப்பட்டுள்ளது" என்றனர்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://bit.ly/47zomWY

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/47zomWY

source https://www.vikatan.com/government-and-politics/governance/state-womens-policy-after-23-years-highlights-of-tn-cabinet-meeting

மாலத்தீவை நோக்கி விரையும் சீனாவின் உளவுக் கப்பல்? - என்ன நடக்கிறது அங்கே?

இந்தியாவிலிருந்து மிக அருகில் இருக்கும் சுற்றுலாத் தலமாக, மாலத்தீவு கருதப்படுகிறது. இந்த நிலையில், சமீபத்தில், பிரதமர் மோடி இரண்டு நாள்கள் பயணமாக லட்சத்தீவுக்குச் சென்றுவந்தார். தனது லட்சத்தீவு பயணம் குறித்த அனுபவங்களை ட்விட்டர் எக்ஸ் தளத்தில் பகிர்ந்த பிரதமர், லட்சத்தீவு பயணத்தின்போது எடுக்கப்பட்ட புகைப்படங்களையும், வீடியோவையும் பகிர்ந்திருந்தார்.

அந்தப் புகைப்படங்களும், வீடியோ பதிவுகளும் சமூக வலைதளங்களில் வைரலாகின. மோடியின் பயணத்தைத் தொடர்ந்து, கூகுளில் அதிகம் `லட்சத்தீவு' குறித்துத் தேடப்பட்டது. இதற்கிடையில், மாலத்தீவு நாட்டின் அமைச்சர்கள் பிரதமர் மோடியை, ‘மாலத்தீவுக்கு மாற்றாக இந்தியாவின் லட்சத்தீவை மிகப்பெரிய சுற்றுலாத் தலமாக மாற்றுவதற்குப் பிரதமர் மோடி முயல்கிறார்.

மாலத்தீவை இந்தியா குறிவைக்கிறது', `இஸ்ரேலின் ஊதுகுழல்' என விமர்சித்து கருத்துகள் தெரிவித்தனர். இதனால் இரு நாடுகளுக்கிடையே சர்ச்சை வெடித்தது.

அதைத் தொடர்ந்து, சர்ச்சையான கருத்துகளைத் தெரிவித்த மூன்று அமைச்சர்களையும் மாலத்தீவு அரசு இடைநீக்கம் செய்தது. அதே நேரம், சீனா சென்ற மாலத்தீவு அதிபர் முகமது முய்ஸு,``சீனா எங்களின் நெருங்கிய நட்பு நாடு. எங்களின் வளர்ச்சி பங்காளிகளில் ஒன்று.

சீனா, மாலத்தீவின் சுற்றுலா வணிகத்தில் கொரோனாவுக்கு முன்பு வரை முதலிடத்திலிருந்தது. அதைத் தொடர வேண்டும்" எனக் கோரிக்கை வைத்திருந்தார்.

இந்த நிலையில் தான் தற்போது மாலத்தீவை நோக்கி சீனாவின் உளவுக் கப்பல் வந்துகொண்டிருப்பதாக IOR (Indian Ocean Region) தகவல் தெரிவித்திருக்கிறது. இது குறித்து வெளியான தகவலில்,``சீன உளவுக் கப்பல், 'ஆராய்ச்சி'க் கப்பல் என்ற பெயரில் மாலத்தீவுக்குச் சென்றுகொண்டிருக்கிறது.

Xiang Yang Hong 03 என்ற இந்தக் கப்பல் தற்போது இந்தோனேசியாவின் கடலில் பயணிப்பதை மரைன் டிராக்கர் செயலி காட்டுகிறது. பிப்ரவரி 8-ம் தேதி மாலத்தீவுக்கு வரவிருக்கிறது." எனக் குறிப்பிட்டிருக்கிறது. ஆனால், இந்தக் கப்பல் குறித்து முன்னணி புவியியல் நிபுணர் டேமியன் சைமன்,``Xiang Yang Hong 03 என்ற இந்தக் கப்பல் 2019 - 2020 காலகட்டத்தில் நீர்நிலைகளை ஆய்வு செய்தது.

4,300 டன் எடையுள்ள இந்தக் கப்பல், இந்தியப் பெருங்கடலை ஆய்வு செய்யும் ஒரு 'ஆராய்ச்சி' கப்பலாக வகைப்படுத்தப்பட்டிருக்கிறது. இது போன்ற ஆராய்ச்சி மூலம், நீருக்கடியில் நிலநடுக்கம் போன்ற இயற்கைப் பேரழிவுகள் குறித்த தரவுகளைச் சேகரித்து, முன்னெச்சரிக்கை நடவடிக்கைகளை மேற்கொள்ள உதவுகிறது. மேலும், கடலின் தரையை மேப்பிங் செய்யும். இதனால், எதிர்காலத்தில் நீர்மூழ்கிக் கப்பல்கள், நீரில் மூழ்கக்கூடிய ட்ரோன்களைப் பயன்படுத்தச் சீனாவுக்கு உதவுகிறது" எனக் குறிப்பிட்டிருக்கிறார்.

source https://www.vikatan.com/government-and-politics/a-chinese-spy-ship-masquerading-as-a-research-vessel-is-en-route-to-maldives

திங்கள், 22 ஜனவரி, 2024

``கூட்டணி முறிவால் கவலைப்பட வேண்டியது பாஜகதான்..!” - சொல்கிறார் பாமக திலகபாமா

`தி.மு.க சாதிவாரி கணக்கெடுப்பை நடத்தாமல் இருக்க என்ன காரணமாக இருக்குமென நீங்கள் கருதுகிறீர்கள்..?”

``சமூக நீதி இயக்கம் எனச் சொல்லிக் கொண்டு சமூக நீதிக்கெதிராக செயல்படுகிறார்கள் என்பதற்கு இதுவொரு அடையாளம். வன்னியர்களுக்கான 10.5% இட ஒதுக்கீட்டில் தகுந்த டேட்டா குறித்து நீதிமன்றம் கேள்வி எழுப்பும் போது தி.மு.க அரசு நினைத்திருந்தால் அதனை 10 நாள்களில் கொடுத்திருக்க முடியும். அதேபோல் இதர மாநிலங்களில் சாதிவாரிக் கணக்கெடுப்பு நடத்துவது போல் இங்கும் நடத்தலாம். இரண்டையும் தேர்தல் நெருக்கத்தில் அறிவித்து வாக்காக மாற்றத்தான் பார்க்கிறார்கள்.”

``சாதிவாரிக் கணக்கெடுப்பு நடத்துவோம், 10.5% இட ஒதுக்கீடு அமல்படுத்த பாடுபடுவோம் என அ.தி.மு.க உறுதியளித்தால் கூட்டணி வைப்பீர்களா?!”

``மக்கள் பிரச்னைகளுக்கு நிற்போம் எனச் சொன்னால் போதாது. அதற்காக நம்பகத்தன்மையையும் அவர்கள் சேர்த்து தரவேண்டும். 10.5% இட ஒதுக்கீடு விவகாரத்தை முன்னெடுத்தார்கள், அதையே ஆளுமையுடன் செய்திருந்தால் இப்போது இந்த பிரச்னையே வந்திருக்காது”

``2024 நாடாளுமன்றத் தேர்தலில் யாருடன் கூட்டணி வைக்கப் போகிறது பா.ம.க?”

``அதனை எங்கள் கட்சியின் பொதுக்குழு கூட்டத்தில்தான் முடிவெடுப்போம். அரசியலில் நிரந்தர நண்பர்களும் எதிரிகளும் கிடையாது என்பது என் கருத்து.”

``சரி, அதிமுக - பாஜக கூட்டணி முறிவு.. யாருக்கு சாதகம்.. யாருக்கு பாதகம்?”

``இது அ.தி.மு.க-வுக்கு சாதகமாக மாறும், அவர்களுக்கு வாக்குகள் கூடும், இஸ்லாமியர்களின் வாக்குகளும் உள்ளே வரும். கவலைப்பட வேண்டியது பா.ஜ.க-தான்”,

``வேல்முருகன் மீண்டும் பா.ம.க-வோடு இணைந்து செயல்படத்தயார்... வி.சி.க-வும் பா.ம.க-வும் இணைந்து செயல்பட வேண்டும் என்றிருக்கிறாரே!”

``வேல்முருகனுக்கு எனது வாழ்த்துகள், வி.சி.க, பா.ம.க ஆகிய இயக்கங்களில் ஒருங்கிணைவு அவசியம் என்ற கருத்தில் உடன்படுகிறேன். பட்டியல் சமூக மக்களின் நலனுக்கானவர் மருத்துவர் ராமதாஸ். இப்போதும் அனைவருக்குமான தலைவராகத்தான் இருக்கிறார். அன்புமணியும் அதன்வழியில் தான் பயணிக்கிறார். அவர்கள் இருந்தால் நாங்கள் இருக்க மாட்டோம் என்ற வெறுப்புணர்வை காட்ட வேண்டிய அவசியத்தை தைலாபுரம் சொல்லிக் கொடுக்கவில்லை”

``வரும்காலங்களில் வி.சி.க, பா.ம.க ஒருங்கிணைவு சாத்தியமாகுமா?”

``அப்படி நிகழ்ந்தால் மிகப் பெரிய வெற்றியை சமூகம் சந்திக்கும். அது நடந்துவிடக் கூடாதென சதி செய்கிறார்கள், அதன்விளைவுதான் வி.சி.க-வுக்கும் பா.ம.க-வுக்கும் இடையே கண்ணுக்கு தெரியாத கோட்டுடன் பிரிந்து நிற்கிறோம், எங்களை சேரவிடாமல் சில அரசியல் சக்திகள் வேலை பார்க்கிறார்கள்” அது யார் என்பதை உங்கள் கணிப்புக்கே விட்டுவிடுகிறேன்”

source https://www.vikatan.com/government-and-politics/governance/bjp-that-should-be-worried-about-alliance-break-up-says-pmk-thilakabama