தன் வாழ்நாள் முழுவதும் இந்து மதத்தையும் அம்மதத்தின் கடவுள்களையும் சாதி, சமய வேறுபாடுகளையும் தொடர்ந்து விமர்சித்து வந்தவர் திராவிடக் கழகத் தலைவர் பெரியார். `இந்தியாவின் வாழ்வியலில் இந்து மதத்தின் பங்கு மிகப் பெரியது' என்று பேசுபவர் பாரதப் பிரதமர் நரேந்திர மோடி. நேரெதிர்க் கொள்கைகளைக் கொண்ட இவர்கள் இருவரும் இன்றைய தினத்தில்தான் பிறந்தனர்.
பொதுவாகவே பெரியார் ஆதரவாளர்களும் பா.ஜ.க ஆதரவாளர்களும் மோதிக் கொள்வது சகஜம். அப்படியிருக்கையில் நேரெதிர் கருத்துகளைக் கொண்ட இருவருக்கும் ஒரே நாளில் பிறந்தநாள் கொண்டாடப்படும்போது கருத்து மோதல்கள் வராமலா இருக்கும்? இன்று பெரியார், மோடி ஆகிய இரு தலைவர்களின் தொண்டர்களும் ட்விட்டரில் ஹேஷ்டேக் யுத்தம் புரிந்து கொண்டிருக்கிறார்கள்.
கடந்த ஆண்டு செப்டம்பர் 17-ம் தேதியன்று, #HBDperiyar141 என்கிற ஹேஷ்டேக் இந்திய அளவில் வெகுநேரம் முதலிடத்தில் ட்ரெண்டானது. #HappyBdayPMModi என்கிற ஹேஷ்டேக் இரண்டாவது இடத்திலும் #FatherOfTamilNation என்ற ஹேஷ்டேக் மூன்றாமிடத்திலும் #Happybirthdaynarendramodi என்கிற ஹேஷ்டேக் நான்காமிடத்திலும் ட்ரெண்டானது. இதனையடுத்து ட்விட்டரில் மோடியைப் பெரியார் பின்னுக்குத் தள்ளிவிட்டதாக தி.க, தி.மு.க-வைச் சேர்ந்தவர்கள் கொண்டாடித் தீர்த்தனர். கடந்த ஆண்டே இருதரப்பினரிடமும் ட்விட்டர் போர் வலுத்திருந்தது. இந்த ஆண்டும் ட்விட்டரில் பெரியார், மோடி ஆதரவாளர்களிடையே எந்த ஹேஷ்டேக் அதிகம் ட்ரெண்டாகிறது என்கிற போட்டி தொடர்ந்து கொண்டிருக்கிறது.
இன்று நண்பகல் 12 மணி நிலவரப்படி, #HappyBirthdayPMModi என்ற ஹேஷ்டேக் முதலிடத்திலும் #HBDPeriyar என்ற ஹேஷ்டேக் நான்காமிடத்திலும் ட்ரெண்டாகி வந்தது. தங்களது தலைவர்களை கொண்டாடும் விதமாக ஹேஷ்டேக்குகளை ட்ரெண்ட் செய்து வரும் அதேநேரத்தில் மோடி ஆதரவாளர்கள் பெரியாரையும், பெரியார் ஆதரவாளர்கள் மோடியையும் தாக்கும் விதமான ஹேஷ்டேக்குகளை ட்ரெண்ட் செய்து வருகின்றனர்.
பெரியார் ஆதரவாளர்களில் சிலர், ஹெச்.ராஜா உயர் நீதிமன்றத்தை அவமதிக்கும் விதமாகக் கூறிய வார்த்தையைக் கொண்டே மோடியை அச்சிலேற்ற முடியாத வார்த்தைகொண்டு விளித்து ஒரு ஹேஷ்டேக்கை ட்ரெண்ட் செய்து வருகின்றனர். அதேபோல தமிழகத்தைச் சேர்ந்த பா.ஜ.க ஆதரவாளர்கள் சிலரும், பெரியார் குறித்த தரக்குறைவான வார்த்தையைக் கொண்டு ஒரு ஹேஷ்டேக்கையும் ட்ரெண்ட் செய்து வருகின்றனர். இந்த இரு ஹேஷ்டேக்குகளுமே இந்திய அளவில் முதல் 20 இடங்களுக்குள் ட்ரெண்டாகி வருகின்றன. இருதரப்பினரும் தங்களது தலைவர்களைக் கொண்டாடுவதை விட்டுவிட்டு இப்படி எதிர்மறையான ஹேஷ்டேக்குகளை ட்ரெண்ட் செய்வது வேதனையளிப்பதாகவும் சிலர் சமூக வலைதளங்களில் கருத்துகளைப் பதிவு செய்து வருகின்றனர்.
பா.ஜ.க ஆதரவாளர்களுக்கும் பெரியார் ஆதரவாளர்களுக்கும் இடையே கருத்து ரீதியான மோதல்கள் எப்போதும் நிகழ்வது வழக்கம். ஆனால், சமீபமாக நாகரீகமற்ற வார்த்தைகள் கொண்ட ஹேஷ்டேக் மோதல்கள்தான் பெரும்பாலும் அரங்கேறி வருகின்றன. இதற்கெல்லாம் ஆரம்பப் புள்ளியாக #GoBackModi ஹேஷ்டேக்கைக் கை காட்டுகிறார்கள் பா.ஜ.க ஆதரவாளர்கள். ``ஒரு நாட்டின் பிரதமர், நமது மாநிலத்துக்கு வரும்போது அவரை வரவேற்காமல், இது பெரியார் மண் என்று சொல்லி அவரை திரும்பிப் போகச் சொல்வது எந்த வகையில் நியாயம். தமிழகத்துக்கும் மோடிதான் பிரதமர் என்பதை மறந்துவிட்டு #GoBackModi ஹேஷ்டேக்கை ட்ரெண்ட் செய்கிறார்கள். பெரியார் ஆதரவாளர்களும் தி.மு.க-வினரும்தான் இந்த ஹேஷ்டேக் யுத்தத்தைத் தொடங்கி வைத்தார்கள்.'' என்று இந்த ஹேஷ்டேக் யுத்தத்துக்கான ஆரம்பப் புள்ளியை விவரிக்கிறார்கள் பா.ஜ.க-வினர்.
எந்த நாளில், #GoBackModi என்ற ஹேஷ்டேக் ட்விட்டரில், இந்திய அளவில் ட்ரெண்டாகிறதோ, அந்த நாளில் பிரதமர் மோடி தமிழகம் வருகிறார் என்பதைத் தெரிந்துகொள்ளலாம். மோடி எப்போது தமிழகம் வந்தாலும் இந்த ஹேஷ்டேக் ட்ரெண்ட் செய்யப்படுவதால் பா.ஜ.க ஆதரவாளர்கள் வெறுப்படைந்தனர். ஒரு சில சமயம் #GoBackModi என்ற ஹேஷ்டேக் உலக அளவிலும் ட்ரெண்டானது குறிப்பிடத்தக்கது.
Also Read: `பிரதமர் மோடி தமிழகம் வந்தபோதெல்லாம் என்ன நடந்தது?’ ஒரு இன்ஃபோகிராப் பயணம்! #VikatanInfographic
பா.ஜ.க ஆதரவாளர்களின் இந்தக் கருத்துக்கு எதிர்க்கருத்து ஒன்றைப் பதிவு செய்கிறார்கள் திமுக-வைச் சேர்ந்த சிலர். ``கர்நாடக பெருமழையில் பாதிக்கப்பட்ட மக்களுக்காகப் பிரார்த்தனை, ஃபிடல் காஸ்ட்ரோ மறைவுக்கு வருத்தம், உத்தரப்பிரதேசத்தில் உயிரிழந்த குழந்தைகளுக்காக வருத்தம், போர்ச்சுகல் நாட்டில் காட்டுத் தீயால் உயிரிழந்தவர்களுக்கு வருத்தம், மாஸ்கோ விமான விபத்தில் உயிரிழந்தவர்களின் குடும்பத்தினருக்கு வருத்தம், கேரள விமான விபத்தில் உயிரிழந்தவர்களின் குடும்பங்களுக்கு ஆறுதல் எனப் பல்வேறு விஷயங்களுக்கு ட்விட் செய்த பிரதமர், டெல்லியில் 150 நாள்களுக்கும் மேலாகப் போராடிய தமிழக விவசாயிகளுக்காக, நீட் தேர்வால் மரணமடைந்த அனிதா உள்ளிட்ட மாணவர்களுக்காக, ராமநாதபுரம் மீனவர்களுக்காக, தூத்துக்குடியில் சுட்டுக் கொல்லப்பட்ட 13 பேருக்காக, குரங்கணி காட்டுத் தீ விபத்தில் உயிரிழந்தவர்களுக்காக எனத் தமிழகத்தில் பாதிப்படைந்தவர்களுக்கு ஆதரவாக அவர் வாய் திறக்கவேயில்லை. அவர்தான் தமிழகத்துக்கும் பிரதமர் என்றால் இவற்றுக்கெல்லாம் ட்விட்டரில்கூட வருத்தம் தெரிவிக்காதது ஏன்? இவை அனைத்தையும் மனதில் கொண்டுதான் #GoBackModi ஹேஷ்டேக்கை மிகப் பெரிய அளவில் தமிழக மக்கள் டிரெண்ட் செய்கிறார்கள். நாங்கள் யாரும் காசு கொடுத்து ட்ரெண்ட் செய்ய வேண்டிய அவசியமில்லை'' என்ற கருத்தை எதிர்க்கட்சியினர் பலரும் பதிவு செய்கின்றனர்.
Also Read: `எத்தனை ரஜினி வந்தாலும் முடியாது!'- பெரியார் குறித்த பேச்சுக்கு ஆர்.பி.உதயகுமார் சொல்வது என்ன?
``பிரதமர் மோடி, பெரியார் ஆகிய இருவரும் நேரெதிர்க் கொள்கைகளைக் கொண்டவர்களாக இருந்தாலும், தங்களுக்கு எதிரான கொள்கை, கோட்பாட்டோடு செயல்படுபவரை நாகரீகமற்ற சொற்களைக் கொண்டு விமர்சிப்பதை ஏற்றுக் கொள்ளமாட்டார்கள் என்பதுதான் உண்மை. ட்விட்டரில் என்ன ட்ரெண்டாகிறது என்பதை இந்திய மக்கள் அனைவரும் உற்றுக் கவனிக்கிறார்கள். அப்படி ஒரு சூழலில் இதுபோன்ற வார்த்தைகளைத் தலைவர்களோடு ஒப்பிட்டு, அதுவும் தமிழில் ட்ரெண்ட் செய்யும் போது தமிழர்கள் மீதான மரியாதைக்கு அது பங்கம் விளைவிக்கும். கொள்கை ரீதியான கருத்துகளை முன்வைத்து எழுப்பப்படும் விவாதங்கள் எப்போதுமே ஆரோக்கியமானவை. ஆனால், இதுபோன்ற நாகரீகமற்ற எதிர்மறை ஹேஷ்டேக்குகள் கொண்டு எல்லைமீறி ட்ரெண்ட் செய்யப்படுவது நல்லதல்ல'' என்கிறார்கள் அரசியல் விமர்சகர்கள்.
இது ஒருபுறமிருக்க, இந்தியா முழுவதும் உள்ள பா.ஜ.க எதிர்ப்பாளர்களும் காங்கிரஸ் கட்சியைச் சேர்ந்தவர்களும் #NationalUnemploymentDay என்ற ஹேஷ்டேக்கை ட்ரெண்ட் செய்து வருகின்றனர். ``2014-ல் தேர்தல் பிரசாரத்தின் போது 2 கோடி வேலை வாய்ப்புகள் ஏற்படுத்தித் தருவதாக உறுதியளித்திருந்தார் மோடி. ஆனால், தற்போது வரை 2 லட்சம் வேலைவாய்ப்புகளைக் கூட அவர் ஏற்படுத்தித் தரவில்லை. அம்பானி, அதானிக்கு ஆதரவாக மட்டுமே செயல்பட்டு வருகிறார்'' என்ற குற்றச்சாட்டை முன்வைத்து #NationalUnemploymentDay என்ற ஹேஷ்டேக் ட்ரெண்ட் செய்யப்பட்டு வருகிறது. இந்திய அளவில் ட்ரெண்டாகி வந்த இந்த ஹேஷ்டேக்கில் இதுவரை 27 லட்சத்துக்கும் அதிகமான ட்விட்கள் பதிவு செய்யப்பட்டுள்ளன.
source https://www.vikatan.com/social-affairs/politics/modi-vs-periyar-hashtag-war-in-twitter
கருத்துகள் இல்லை:
கருத்துரையிடுக