ஊட்டி: ஆபாச சைகை காண்பித்த அ.தி.மு.க பிரமுகரின் மகன்! - வீடியோ எடுத்து சிக்கவைத்த போலீஸார்

நீலகிரி மாவட்டம் ஊட்டி ஏ.டி.சி பகுதியில் காவல்துறையினர் நேற்று வழக்கமான வாகன சோதனையில் ஈடுபட்டு வந்துள்ளனர். முகக்கவசம்,சீட் பெல்ட் போன்றவற்றின் அவசியம் குறித்து ஓட்டுநர்களுக்கு அறிவுறுத்தி வந்துள்ளனர்.

வாகன சோதனை

அப்போது அ.தி.மு.க கொடி பொருத்தப்பட்ட, ஒற்றை இலக்க எண்ணைக் கொண்ட கார் ஒன்று எட்டின்ஸ் சாலையிலிருந்து வந்துள்ளது.காரை இயக்கிய இளைஞரும் அருகில் அமர்ந்திருந்த மற்றொரு நபரும் முகக்வசம்,சீட் பெல்ட் அணியாமல் இருந்துள்ளனர். மேலும், சர்க்கிளில் ராங்க் ரூட்டில் செல்லவும் முயற்சித்துள்ளனர்.

எனவே காவல்துறையினர் அந்த வாகனத்தை நிறுத்த முயற்சித்துள்ளனர். வாகனத்தை நிறுத்தாமல் சென்ற‌ அந்த இளைஞர், காவல்துறையினரைப் பார்த்து தனது கை விரலை உயர்த்தி ஆபாச சைகையைக் காண்பித்துள்ளார். பணியில் இருந்த சக காவல்துறையினர் தங்களது மொபைல் போனில் இதனை வீடியோ எடுத்துள்ளனர்.

அ.தி.மு.க பிரமுகர் ‌கோபால கிருஷ்ணன் கார்

இந்த வீடியோ காவல்துறை உயர் அதிகாரிகளின் கவனத்தி்ற்கும் கொண்டு செல்லப்பட்டுள்ளது.மேலும் இது தொடர்பாக வாகனத்தை நிறுத்திய காவலர், காவல் நிலையத்தில் புகார் அளித்துள்ளார். இந்த புகாரின் பேரில் விசாரணை மேற்கொள்ளப்பட்டு வருகிறது.

காரில் வந்தது ஊட்டி நகராட்சியின்‌ முன்னாள் துணைத் தலைவரும், ஊட்டியில் உணவகம் நடத்திவரும் அ.தி.மு.க பிரமுகர் ‌கோபால கிருஷ்ணன் மற்றும் அவரது மகன் என்பது தெரியவந்துள்ளது.

அ.தி.மு.க பிரமுகர் ‌கோபால கிருஷ்ணன் மகன்

இது குறித்து நம்மிடம் பேசிய காவலர் ஒருவர்,``நேத்து ஒரு‌ 12 மணி இருக்கும் இந்த வண்டி வந்துச்சி. உள்ளூர் வண்டிதான் சார், எங்களுக்கும் நல்லா தெரியும். நாங்களும்‌ எதுவும் தப்பா சொல்லல.ரோட் ரூல்ஸ மீறாம லெஃப்ட்ல டர்ன் பண்ண சொன்னோம். அதுக்கு கோபால கிருஷ்ணன் மகன் எங்களப் பாத்து ஆபாசமா கைய காமிச்சிட்டு போறாரு.நல்ல வேலையா வீடியோ எடுத்தோம்" என்றார்.

Also Read: நீலகிரி: சுற்றுலாத் தலங்கள் எதுவும் திறக்கப்படாது... இ-பாஸ் கட்டாயம்! - ஆட்சியர் அதிரடி

ஊட்டி நகராட்சியின்‌ முன்னாள் துணைத் தலைவரும் அ.தி.மு.க பிரமுகருமான கோபால கிருஷ்ணனிடம் பேசினோம். ``நான் அந்த சமயத்துல கார்ல இல்ல. இது ஒண்ணும் பெரிய விஷயம் இல்ல.பையனோட ஃபிரண்ட்ஸ் திருப்பூர்ல இருந்து வந்துருக்காங்க. அவங்கள வெல்கம் பண்ண கைய‌ காமிச்சிருக்காப்ள. என்னோட நேம டேமேஜ் பண்ண போலீஸ் பேரச் சொல்லி யாரே மிஸ்யூஸ் பண்ணிட்டாங்க" என முடித்துக்கொண்டார்.

அ.தி.மு.க பிரமுகர் ‌கோபால கிருஷ்ணன் கார்

இது குறித்து நீலகிரி மாவட்ட எஸ்.பி சசிமோகன் கூறுகையில், ``ஊட்டியில் வாகன சோதனை செய்துகொண்டிருந்த காவலர்களிடம் காரில் வந்த நபர் ஒருவர் ஆபாச சைகை காண்பித்துள்ளது தொடர்பாக விசாரணை மேற்கொள்ளப்பட்டு வருகிறது. சட்ட ரீதியாக நடவடிக்கை எடுக்கப்படும்"என்றார்.

source https://www.vikatan.com/news/controversy/ooty-admk-cadres-obscene-sign-towards-police-caught-in-video