தூத்துக்குடி மாவட்டம் ஏரல் காவல் நிலையத்தின் உதவி ஆய்வாளராகப் பணிபுரிந்து வந்ததவர் பாலு. அதே காவல் நிலையத்தில் காவலராகப் பணிபுரிந்து வந்த பொன் சுப்பையாவும் ஏரல் பகுதியில் ரோந்துப் பணியில் ஈடுபட்டனர். (கடந்த 31-ம் தேதி) இரவு 9.30 மணியின் போது ஏரல் பஸ் ஸ்டாண்ட் அருகில் உள்ள பானிபூரிக் கடையில், தீப்பாச்சி கிராமத்தைச் சேர்ந்த முருகவேல், “எனக்கு சிக்கன் ரைஸ் வேணும்” என மதுபோதையில் தகராறு செய்தபோது எஸ்.ஐ., பாலு நேரடியாகச் சென்று முருகவேலை எச்சரித்து அனுப்பியுள்ளார்.
அடுத்த ஒரு மணி நேரத்தில் பஸ் ஸ்டாண்ட் வெளிப்பகுதியிலுள்ள மற்றொரு ஹோட்டலில் தகராறு செய்தபோது, எஸ்.ஐ., பாலு லோடு ஆட்டோவில் வந்த முருகவேலை அப்படியே ஸ்டேஷனுக்கு அழைத்துச் சென்று லோடு ஆட்டோவை நிறுத்தச் சொல்லிவிட்டு எச்சரித்ததுடன் மறுநாள் காலையில் ஆர்.சி புக், இன்சூரன்ஸ், லைசன்ஸின் ஒரிஜினல்களை எடுத்து வரச்சொல்லி அனுப்பியுள்ளார். மீண்டும் நள்ளிரவு சுமார் 1 மணிக்கு அவரின் வீட்டின் உரிமையாளர் குமரேசனின் லோடு ஆட்டோவில் கொற்கை விலக்குப் பகுதியில் சுற்றிக் கொண்டிருந்த முருகவேலை மீண்டும் எச்சரித்து அனுப்பினார்.
மதுபோதையின் உச்சத்திலிருந்த முருகவேல், எஸ்.ஐ., பாலு, காவலர் பொன் சுப்பையா இருவரும் சென்ற பைக்கை பின் தொடர்ந்து வேகமாக மோதினார். இதில், இருவரும் பலத்த காயம் அடைந்தனர். மருத்துவமனைக்குச் செல்லும் வழியிலேயே எஸ்.ஐ., பாலு உயிரிழந்தார். காவலர் பொன் சுப்பையா சிகிச்சை பெற்று வருகிறார். எஸ்.ஐ., பாலுவின் உடல் அவரது சொந்த ஊரான முடிவைத்தானேந்தலுக்கு கொண்டு வரப்பட்டது. அங்கு 30 துப்பாக்கி குண்டுகள் முழங்க இறுதி அஞ்சலி செலுத்தப்பட்டு அவரது உடல் அடக்கம் செய்யப்பட்டது.
ஊர் மக்கள் கண்ணீருடன் அஞ்சலி செலுத்தினார்கள். எஸ்.ஐ., பாலுவுக்கு பேச்சியம்மாள் என்ற மனைவியும், ஜெயதுர்க்கா வேணி என்ற மகளும், அருள் வேலாயுதம் என்ற மகனும் உள்ளனர். மகள் திருமணமாகி உள்ளூரில் வசித்து வருகிறார். மகன், அரியலூரில் கனரா வங்கியில் வேலை செய்து வருகிறார். சோகம் பரவிக் கிடந்த முடிவைத்தானேந்தல் கிராமத்திலுள்ள பாலுவின் வீட்டிற்குச் சென்றோம். உயிரிழந்த கணவரை நினைத்து மூலையில் கண்ணீருடன் அமர்ந்திருந்தார் பாலுவின் மனைவி பேச்சியம்மாள்.
அவருக்கு ஆறுதல் கூறிவிட்டுப் பேசினோம், “நைட்ல டூட்டிக்குப் போகும் போதுகூட நான் வர முன்னப்பின்ன ஆகும். மாத்திரையைப் போட்டுட்டு ரெஸ்ட் எடு”ன்னு சொல்லிட்டுப் போனாரு. ஆனா, என் குலசாமிய உடம்பாத்தான் பார்த்தேன். இனிமேல் நான் மட்டும் இருந்து என்ன செய்யப்போறேன்” என விம்மி அழுதார். ஊர் மக்களிடம் பேசினோம், “இந்த முடிவைத்தானேந்தல் ஊருக்கு ஒரு சிறப்பு உண்டு. வீட்டுக்கு ஒருத்தர் மிலிட்டரியில சர்வீஸ்ல இருப்பாங்க.
இல்லேன்னா, போலீஸ் டிபார்ட்மென்ட்ல இருப்பாங்க. எங்க ஊருக்கே ’போலீஸ்காரங்க ஊரு’ன்னுதான் பேரு. பாலு அண்ணன் ஊருல அமைதியான ஆளு. அவரோட அப்பாவும் ஏட்டா இருந்து ரிட்டையர்டு ஆனவர். அப்பாவை மாதிரி தானும் போலீஸ் ஆகணும்ங்கிற கனவுல இருந்தார். காவலரா வேலைக்குச் சேர்ந்து ரைட்டர், எஸ்.எஸ்.ஐ.,யா இருந்து கடைசியா எஸ்.ஐ.,யா பதவி உயர்வுல வேலை பார்த்தவர். மூணு வருசத்துக்கு முன்னால ஆறுமுகநேரி போலீஸ் ஸ்டேஷன்ல வேலை பார்த்தப்போ ஒரு பைக் விபத்துல கால்கள் முறிஞ்சுடுச்சு.
அவரோட ரெண்டு காலுலயும் பிளேட் வச்சு ஆபரேசன் செஞ்சிருக்காங்க. ரொம்ப சிரமப்பட்ட அவர் கொஞ்சம் கொஞ்சமாத் தேறி வந்தார். ”நீங்க வேலை பார்த்தது போதும். இந்த வேலை வேணாம்ப்பா. உங்க உடல்நிலைதான் எங்களுக்கு முக்கியம்னு பிள்ளைகள் சொன்னப்போக்கூட, ’போலீஸ் வேலையில இதெல்லாம் சகஜம். எங்க அப்பாவை மாதிரியே நானும் நல்ல படியா சர்வீஸை முடிக்கணும்”னு சொன்னார். கொரோனா காலத்துலயும் சிறப்பா டூட்டி பார்த்தார்.
ஏரல் ஸ்டேஷன்ல முதலில் இவருக்குதான் கொரோனா தொற்று ஏற்பட்டுச்சு. சிகிச்சை முடிஞ்ச மறுநாளே யூனிபார்மை மாட்டிட்டு டூட்டிக்கு கிளம்பிட்டார். ஊருலயும் சரி, ஸ்டேஷன்லயும் சரி அவர் அதிர்ந்து கூடப் பேசினதில்ல. சிரிச்ச முகமா இருப்பார் பாலு அண்ணன். ஸ்டேஷனுக்கு புகார் கொடுக்க வர்றங்க கிட்டயும் கறார் காட்டுனதில்ல. லத்தியால அடிச்சுக் கண்டிச்சத விட, ‘உன் அப்பா இடத்துல இருந்துச் சொல்றேன். அண்ணன் இடத்துல இருந்துச் சொல்றேன்’ன்ன்னு புத்திமதி சொல்லித்தான் பார்த்திருக்கோம்.
ஏரல் சுற்று வட்டாரப் பகுதிகள்ல கஞ்சா நடமாட்டம் அதிகமா இருக்கு. அதை ஓரளவு கட்டுப்படுத்தினதுல பாலு அண்ணனோட பங்கு அதிகம் உண்டு. ஸ்டேஷன் லிமிட்டுக்குள்ள எங்க என்னப் பிரச்னைன்னாலும், மத்த போலீஸை எதிர்பார்க்காம தகவல் கிடைச்சதும் உடனே கிளம்பிடுவார்.
எங்கவூர்ல இளசுகள் போலீஸ் வேலைக்குப் போயி யூனிபார்ஃம் மாட்டுறதுக்கு பாலு அண்ணனும் முக்கியக் காரணம். அவர்தான் போலீஸ் வேலையில சேர்றதுக்கு அதிக ஊக்கமும் தன்னம்பிக்கையும் கொடுத்தவர். இப்படிப்பட்ட மனுசனை லோடு ஆட்டோவால மோதிக் கொல்லணும்னு அந்தப் பாவிக்கு எப்படித்தான் மனசு வந்துச்சோ” என்றனர்.
source https://www.vikatan.com/news/crime/people-shares-about-police-sub-inspector-who-killed-by-load-auto-driver
கருத்துகள் இல்லை:
கருத்துரையிடுக