``இந்த ட்ரிப்ப நான் கேன்சல் பண்ணமுடியாது. அப்படி பண்ணுனா என்கிட்ட காசு எடுத்துடுவாங்க. நீ ஒழுங்கா கேன்சல் பண்ணு. இல்லைன்னா உன்ன தேடி வந்து வெட்டுவேன்" என்று ஓலா ஆட்டோ டிரைவர் ஒரு பயணியை காதில் கேட்க முடியாத வார்த்தைகளால் திட்டும் ஆடியோ சமூக வலைதளங்களில் வைரலாகிக் கொண்டிருக்கிறது. என்ன நடந்தது. எதற்காக அந்த ஓலா ஆட்டோ டிரைவர் அப்படி பேசினார்.
ஆடியோ வெளியிட்ட திருச்சியைச் சேர்ந்த இளைஞரிடம் பேசினோம். ”தீபாவளி மறுநாள் 5-ம் தேதி சாயங்காலம் வீட்டுல அப்பா, அம்மாவை அழைச்சுக்கிட்டு துணி கடைக்கு போயிருந்தேன். துணி எடுத்துட்டு அவங்களால டூவீலருல வரமுடியாததால, ஆட்டோவுல போகலாம்னு சொன்னாங்க. சரி என்று திருச்சி செயின்ட் ஜோசப் சர்ச்கிட்ட நின்றுக்கொண்டு, ஓலா (Ola TN-79-A- 9070) ஆட்டோ புக் பண்ணினேன். அதுக்கு கட்டணம் 90 ரூபாய் என்று எனது வேலட்டில் காட்டியது. கொஞ்சம் நேரம் கழித்து அந்த ஆட்டோ டிரைவர் போன் பண்ணினார். ``சார் நீங்க சொல்ற தூரத்திற்கு 90 ரூபாய் பத்தாது.
கொஞ்சம் அதிகமா கொடுங்க சார்” என்றார். வழக்கமா ஆட்டோ டிரைவர் கேட்பது தானே என்று 120 ரூபாய் கொடுக்க சம்மதித்து அவரை வரச்சொன்னேன். கொஞ்சம் நேரம் கழித்து மீண்டும் அந்த ஆட்டோ டிரைவர் போன் பண்ணி, ``சார் பனானா லீப்கிட்ட (Banana Leaf) ஹோட்டல் பக்கத்துக்கு வாங்க” என்றார். அதற்கு நான், ``சார் என்னோட அம்மா, அப்பா உடல்நிலை சரியில்லாதவுங்க.. வயசானவுங்க. அவ்வளவு தூரம் வர்றது கஷ்டம்.
நீங்க வாங்க சார்” என்றேன். அதுக்கு அவரு, `நீ கொடுக்குற காசுக்கு இங்கிருந்து தான் வரமுடியும்!' என்று தரக்குறைவான ஒரு வார்த்தையை விட்டார். பதிலுக்கு நான் பேச, எங்களுக்குள் வாக்குவாதம் ஏற்பட்டது. அதுக்கு ஆட்டோ டிரைவர், ``இந்த ட்ரிப்ப நான் கேன்சல் பண்ணமுடியாது. அப்படி பண்ணுனா என்கிட்ட காசு எடுத்துடுவாங்க. நீ ஒழுங்கா கேன்சல் பண்ணு’’ என்று மிரட்டலாக சொன்னார்.
என்னங்க மிரட்டுறீங்கன்னு கேட்டதுக்கு, ``ஒழுங்கு மரியாதையா ட்ரிப்ப கேன்சல் பண்ணுடா. இல்லைன்னா எங்கிருந்தாலும் தேடி வந்து வெட்டுவேன்’’ என்றார். `என்னங்க இப்புடி பேசுறீங்கன்னு’ என்றதற்கு, காதில் கேட்க முடியாத வார்த்தைகளால் திட்டினார். அந்த ஆடியோவை சமூக வலைதளங்களில் பகிர்ந்ததோடு, ஓலா நிர்வாக அதிகாரிகளிடம் பேசினேன். அவர்களும் அந்த ஆடியோவை கேட்டுவிட்டு, அவர் மீது நடவடிக்கை எடுப்பதாக சொல்லியிருக்கிறார்கள். காவல் நிலையத்திலும் புகார் கொடுக்க இருக்கிறேன்.
என்மீது என்னங்க தப்பு இருக்கு. அவர் அதிகமா கேட்ட பணத்தையும் கொடுக்கிறேன் என்று தான் சொன்னேன். நாங்கள் இருக்கும் இடத்துக்கு வராமல், இவர் நிற்கும் இடத்திற்கு வரச்சொன்னால் என்ன அர்த்தம். ஓலா ஆட்டோன்னா என்ன சார். அதுவே எனக்கு புரியலை. விவரம் தெரிந்த எனக்கே இந்த நிலைமைன்னா...ஒன்னும் தெரியாத சாமான்ய மக்களை எப்படி எல்லாம் பேசுவாங்க.
Also Read: "அடப்போங்கப்பா வண்டி எப்பதான் வரும்?!"- ஓலா ஸ்கூட்டர் டெலிவரியில் என்ன பிரச்னை? ஏன் இவ்வளவு தாமதம்?
இதுமாதிரி ஆட்டோ டிரைவர்களால் தான் ஒட்டுமொத்த ஆட்டோ டிரைவர்களுக்குமே கெட்டபெயர். இவர் மீது கடுமையான நடவடிக்கை எடுக்கணும் என்று என்னிடம் பேசிய ஆடியோ, என்ன நடந்தது என்று நான் பேசிய ஒரு ஆடியோவை சமூக வலைதளங்களில் பகிர்ந்திருக்கிறேன். அவர் மீது நடவடிக்கை எடுக்கும் வரையிலும் விடமாட்டேன" என்றார் காட்டமாக.
இதுகுறித்து ஆட்டோ டிரைவர் ராஜவேலிடம் பேசினோம்.``என்மீது எந்த தவறும் இல்லை. அவர் தான் உன்னால் முடிந்ததை பாரு என்றார். அந்த கடுப்பில் தான் பேசினேன்" என்றார்.
தகவலைச்சொல்லி திருச்சி மாநகர காவல் துணை ஆணையர் சக்திவேலிடம் பேசினோம். முழுமையாக கேட்டுக்கொண்டவர் ``கண்டிப்பாக விசாரித்து நடவடிக்கை எடுக்கிறேன்” என்றார்.
source https://www.vikatan.com/news/crime/ola-driver-speaks-in-harsh-language-with-costumer
கருத்துகள் இல்லை:
கருத்துரையிடுக