`பாவம் அவரே கன்பீஸ் ஆயிட்டாரு' என்ற வடிவேலுவின் டயலாக்தான் ஞாபகம் வருகிறது. ஏன், என்னாச்சு என்கிறீர்களா?
பின்னே... குளிரில் நடுங்க வைக்கும் டிசம்பரில் மழை பெய்கிறது. கோடை தொடங்க வேண்டிய பிப்ரவரி இறுதியில் குளிரடிக்கிறது. அங்கிருந்து சடன் பிரேக் போட்டு யு டர்ன் எடுத்து வழக்கத்தைவிட முன்னதாகவே திடீரென வெயில் வாட்ட ஆரம்பித்திருக்கிறது.
இயற்கையைப் பார்த்து `பாவம் அவரே கன்பீஸ் ஆயிட்டாரு' என்றுதானே சொல்லத் தோன்றுகிறது. காமெடி இருக்கட்டும்... ஒரு பக்கம் மீண்டும் மிரட்டத் தொடங்கியிருக்கும் கொரோனா, இன்னொரு பக்கம் கொளுத்த ஆரம்பித்திருக்கும் வெயில்...
கூல்....
இரண்டையும் சமாளிக்க வீட்டிலிருந்தபடியே குளுகுளுவென விதம் விதமான பாப்சிகல் செய்து சாப்பிடுங்களேன்... இந்த வீக் எண்டுக்கு உங்க வீட்டு ட்ரீட்டாக இருக்கட்டும்...
தேவையானவை:
ஃபிரெஷ் ஆரஞ்சு ஜூஸ் - 400 மில்லி
எலுமிச்சைச் சாறு - 1 டேபிள்ஸ்பூன்
சர்க்கரை - 50 கிராம்
வெனிலா எசன்ஸ் - 1 டீஸ்பூன்
செய்முறை:
ஒரு பவுலில் ஆரஞ்சு ஜூஸ், எலுமிச்சைச்சாறு, சர்க்கரையைச் சேர்த்துக் கரையும் வரை நன்கு கலக்கவும். இதில் வெனிலா எசன்ஸை சேர்க்கவும். இந்தக் கலவையை பாப்சிகல் மோல்டில் அல்லது டம்ளரில் ஊற்றி ஃபீசரில் வைத்து லேசாக கெட்டியாகத் தொடங்கும்போது டம்ளர்/மோல்டின் நடுவே மர ஐஸ்குச்சிகளைச் செருகவும். ஒரு நாள் இரவு முழுவதும் ஃப்ரீசரில் வைத்துவிட்டு மறுநாள் எடுத்து குளிர்ந்த/சூடான தண்ணீரை மோல்டின் வெளிப்புறம் மீது ஊற்றினால், இலகுவாக பாப்சிகலை வெளியே எடுத்துப் பரிமாறலாம்.
தேவையானவை:
நன்னாரி சர்பத் - 3 டேபிள்ஸ்பூன்
தேன் - 2 டேபிள்ஸ்பூன்
எலுமிச்சைச் சாறு - 2 டேபிள்ஸ்பூன்
பேசில் விதைகள் - 1 டேபிள்ஸ்பூன் (டிப்பார்ட்மென்ட் ஸ்டோர்களில் கிடைக்கும்)
தண்ணீர் - 400 மில்லி
செய்முறை:
ஒரு பவுலில் பேசில் விதைகளைச் சேர்த்து தேவையான அளவு தண்ணீர் ஊற்றி 15 நிமிடம் ஊற வைக்கவும். இனி நன்னாரி சிரப், தேன், எலுமிச்சைச் சாறு, 400 மில்லி தண்ணீர் சேர்த்து நன்கு கலக்கவும். இறுதியாக, ஊறிய பேசில் விதைகளை மட்டும் (தண்ணீர் வேண்டாம்) சர்பத் கலவையோடு சேர்க்கவும். இதை பாப்சிகல் மோல்டு/டம்ளரில் ஊற்றி ஃப்ரீசரில் வைக்கவும். கலவை பாதியளவு கெட்டியானதும் நடுவில் ஐஸ்க்ரீம் ஸ்டிக்கை செருகி மீண்டும் நான்கு முதல் ஆறு மணி நேரம் வரை ஃப்ரீசரில் வைக்கவும். பிறகு, வெளியே எடுத்து மோல்டின் வெளிப்புறத்தைத் தண்ணீரில் காட்டினால், டம்ளர்/மோல்டில் இருந்து ஐஸ்க்ரீமை எளிதாக வெளியே எடுக்க வரும்.
தேவையானவை:
பழுத்த அவகாடோ - 1
வெனிலா எசன்ஸ் - 1 டேபிள்ஸ்பூன்
தண்ணீர் - 200 மில்லி
க்ரீன் டீ பேக் - 5 கிராம்
தேன் (அ) சர்க்கரை - 4 டேபிள்ஸ்பூன்
செய்முறை:
அடுப்பில் ஒரு கடாயை வைத்து தண்ணீர் ஊற்றி சுட வைக்கவும். இந்தத் தண்ணீரை ஒரு டம்ளரில் ஊற்றி, அதில் டீ பேக்கை போடவும். இரண்டு நிமிடம் கழித்து, டீ பேக்கை எடுத்துவிட்டு தண்ணீரை ஆற விடவும். அவகாடோவை பாதியாக நறுக்கி கொட்டை நீக்கி சதைப்பகுதியை மட்டும் க்யூப் வடிவத்துக்கு நறுக்கி வைக்கவும். ஆறிய தண்ணீரில் அவகாடோவைச் சேர்த்து கூழாக மசித்துக் கலக்கவும். சர்க்கரை சேர்க்க நினைப்பவர்கள் அவகாடோ சேர்க்கும்போதே சேர்த்து அடித்துக் கலக்கவும். தண்ணீரும் அவகாடோவும் ஒன்றாக வேண்டும். இதில் தேனை தேவைப்படும் அளவுக்குக் கலந்துகொள்ளுங்கள். இதை பாப்சிகல் மோல்டிலோ, டம்ளரிலோ ஊற்றி ஓரளவு கெட்டியானதும் நடுவில் குச்சியை வைக்கவும். இதை ஒரு நாள் இரவு முழுவதும் ஃப்ரீசரில் வைத்துவிட்டால், பாப்சிகல் ரெடி. ஃப்ரீசரில் இருந்து எடுத்தவுடன் சூடான/குளிர்ந்த தண்ணீரை டம்ளர் அல்லது மோல்டின் வெளிப்புறம் மீது ஊற்றினால் இலகுவாகக் கத்தியை வைத்து பாப்சிகலை எடுத்துவிடலாம்.
தேவையானவை:
மீடியம் சைஸ் ஸ்ட்ராபெர்ரி பழங்கள் - 10
எலுமிச்சைச் சாறு - 2 டேபிள்ஸ்பூன்
தண்ணீர் - 400 மில்லி
செய்முறை:
கழுவிய ஸ்ட்ராபெர்ரிகளை பிளெண்டரில் சேர்த்துக் கூழாக அரைத்து வைக்கவும். இதில் எலுமிச்சைச் சாறு, தண்ணீர் சேர்த்துக் கலக்கவும். இதை பாப்சிகல் மோல்டில் ஊற்றி, நடுவில் குச்சி வைத்து க்ளிங் ரேப்பரால் (பழம்/உணவை மூடும் கண்ணாடி போன்ற பேப்பர்) மூடவும். எட்டு மணி நேரம் ஃப்ரீசரில் வைத்து, பின்பு வெளியே எடுத்து மோல்டின் பின்பக்கத்தை சிறிது நேரம் தண்ணீரில் காட்டினால் பாப்சிகலை சுலபமாக வெளியே எடுத்துவிட முடியும்.
source https://www.vikatan.com/food/recipes/weekend-recipes-of-summer-special-popsicles
கருத்துகள் இல்லை:
கருத்துரையிடுக