`மனிதக் கழிவுகளை மனிதரே அகற்றும் இழிவு முறை முற்றிலுமாக ஒழிக்கப்படும். குடும்பத் தலைவிகளுக்கு மாதம் ரூ.1,000, பட்டியலினத்தவர்களுக்கு இருமடங்கு கல்வி உதவித்தொகை, குடிநீர், விவசாயம்’ என பத்து ஆண்டுகளுக்கான தொலைநோக்கு திட்டத்தைத் திருச்சி கூட்டத்தில் அறிவித்திருக்கிறார் தி.மு.க தலைவர் ஸ்டாலின்.
`விடியலுக்கான முழக்கம்' என்ற பெயரில் திருச்சி சிறுகனூரில் தி.மு.க சார்பில் தேர்தல் சிறப்புப் பொதுக்கூட்டம், மாநாடு போல் பிரம்மாண்டமாக நடைபெற்றது. இதில், `தமிழகத்திற்கு அடுத்த 10 ஆண்டுகளுக்கான தொலைநோக்கு திட்டத்தை ஸ்டாலின் அறிவிக்க இருக்கிறார்’ என முன்னரே தெரிவிக்கப்பட்டது. இதில் பெருமளவில் தொண்டர்களும் கட்சி நிர்வாகிகளும் கலந்துகொண்டனர். அப்படி என்ன தான் அறிவிக்கப் போகிறார் என்று எல்லோரது பார்வையும் இம்மாநாட்டை நோக்கியே இருந்தது.
இந்நிலையில் இக்கூட்டத்தில் கலந்து கொள்வதற்காக தி.மு.க தலைவர் ஸ்டாலின் சென்னையிலிருந்து விமானம் மூலம் நேற்று காலை 11.30 மணியளவில் திருச்சி வந்தார். விமான நிலையத்தில், அவருக்கு கே.என்.நேரு தலைமையில் தொண்டர்களின் உற்சாக வரவேற்பு அளிக்கப்பட்டது.
சிறிது நேர ஓய்வுக்கு பின் மதியம் 1 மணியளவில் ஸ்டாலின், கூட்டம் நடைபெறும் இடத்துக்கு வந்தார். மாநாட்டுத் திடலின் நுழைவாயிலில் பிரம்மாண்டமாக அமைக்கப்பட்டிருந்த கொடிக்கம்பத்தில் தி.மு.க கொடியை ஏற்றி வைத்தார். பின்பு ஆறே முக்கால் மணியளவில் மேடை ஏறினார் ஸ்டாலின். இக்கூட்டத்தில் லட்சகணக்கான தி.மு.க தொண்டர்கள் கலந்துக்கொண்டன.
பொதுக்கூட்டத்தில் தி.மு.க முதன்மை செயலாளர் கே.என்.நேரு மைக்கைப்பிடித்து பேசினார். ”1996ம் ஆண்டு தொண்டர் கூட்டத்தில் சிக்கிக்கொண்டார் ஸ்டாலின். பின்பு இரு சக்கர வாகனத்தில் ஸ்டாலின் வந்து சேர்ந்தார். அதே போல இன்றும் காவல்துறையைச் செய்த தவறுகளால், போக்குவரத்து நெரிசல் கடுமையாக ஏற்பட்டுள்ளது. வேனிலிருந்து இறங்கி காரில் வந்து ஸ்டாலின் சேர்ந்துள்ளார்.
பாடாலூர் வரையிலும் வாகனங்கள் நின்று கொண்டிருக்கிறது. அவர்களும் வந்து சேர்ந்திருந்தால் இந்த திடல் பத்தாது. தமிழகத்தின் விடியலுக்கான முழக்கத்தை ஸ்டாலின் எழுப்பி வருகிறார். ஸ்டாலின் என்றால் உழைப்பு, தி.மு.க தொண்டர்கள் அத்தனை பேரும் உங்கள் பின்னால் அணிவகுத்து நிற்போம். நமது ஆட்சி தான் மலரப்போகிறது. அதற்காக உழைக்கவேண்டும் ” என்று சுருக்கமாக முடித்துக்கொண்டார்.
தி.மு.க தலைவர் ஸ்டாலின் பேசுகையில், ``மனிதக் கழிவுகளை மனிதரே அகற்றும் இழிவு முறை முற்றிலுமாக ஒழிக்கப்படும். குடும்பத் தலைவிகளுக்கு மாதம் ரூ.1,000, பட்டியலினத்தவர்களுக்கு இருமடங்கு கல்வி உதவித்தொகை குடிநீர், விவசாயம், வளரும் வாய்ப்புகள், வளமான தமிழ்நாடு, மகசூல் பெருக்கம், குடிமக்கள் அனைவருக்கும் குறையாத தண்ணீர், அனைவருக்கும் உயர்தரக் கல்வி மற்றும் உயர்தர மருத்துவம், எழில்மிகு மாநகரங்களின் மாநிலம், உயர்தர ஊரகக் கட்டமைப்பு, உயர்ந்த வாழ்க்கைத் தரம், அனைவருக்கும் அனைத்துமான தமிழகம். இந்த இலக்குகளை எட்டியாக வேண்டும்” என்றார்.
தொடர்ந்து, ``அறிஞர் அண்ணா முதன்முதலில் முதல்வரான போது சொன்ன வரிகள் எனக்கு நினைவுக்கு வருகிறது. எல்லா எண்ணங்களும் ஓர் அடிப்படையான லட்சியத்தையே நோக்கியே வட்டமிடுகின்றன. மக்களுக்கு நல்வாழ்வு தரவேண்டும் என்ற லட்சியம். லட்சியம் மிகப்பெரியது. நான் சாமானியன். ஆனால் உங்கள் தோழன். ஆகவே என்னுடைய திறமையை நம்பி அல்ல, உங்கள் எல்லோருடைய திறமையையும் நம்பி இந்தப் பணியில் ஈடுபடுகிறேன்” என்றார்.
தொடர்ந்து பேசிய ஸ்டாலின், ``அதேபோல் உங்கள் மீது நம்பிக்கை வைத்து இந்த உறுதிமொழியை எடுத்துக் கொள்கிறேன். கோடிக்கணக்கான மக்களின் ஆதரவோடு நாம் அமைக்கும் ஆட்சியானது, இவற்றை நிறைவேற்றித் தரும் ஆட்சியாக அமையும். ஏழு கோடி மக்களின் இதயங்களை வெல்வதன் மூலமாக - இந்த ஏழு தொலைநோக்குத் திட்டங்களையும் நம்மால் செயல்படுத்திக் காட்ட முடியும். கழக ஆட்சி என்பது தனிப்பட்ட ஒரு கட்சியின் ஆட்சி இல்லை.
ஓர் இனத்தின் ஆட்சியாக அமையும். தனிப்பட்ட ஓர் அரசியல் இயக்கத்தின் கொள்கையை மட்டும் இல்லாமல். இந்த மனித சமுதாயத்தின் உயர்ந்த லட்சியங்களை அடையக் கூடிய ஆட்சியாக அமையும். நாம் கொள்கைக்குச் சொந்தக்காரர்கள். அந்தக் கொள்கையைச் செயல்படுத்தும் கடமை நமக்குத் தான் இருக்கிறது. அந்தக் கடமையை நாம் தான் செய்தாக வேண்டும். நம்மைத் தவிர வேறு யாராலும் செய்ய முடியாது. இன்னும் இரண்டே மாதங்கள் தான் இருக்கின்றன, தி.மு.க ஆட்சி கட்டிலில் அமர. அப்படி அமையும் அரசு, தனிப்பட்ட ஸ்டாலினின் அரசாங்கம் அல்ல. நம் அனைவரின் அரசாங்கமாக இருக்கும். அதற்காக நாம் அனைவரும் பாடுபடவேண்டும்” என்றார்.
source https://www.vikatan.com/news/politics/what-happened-in-dmk-trichy-public-meeting
கருத்துகள் இல்லை:
கருத்துரையிடுக