கஜா புயலின் போது காரைக்காலில் தரை தட்டி நிற்கும் கப்பல் கடந்த இரண்டு ஆண்டுகளாக அதே இடத்தில் நிற்கிறது. அதனை அப்புறப்படுத்த நடவடிக்கை எடுக்கப்பட்டு வருகிறது.
காரைக்கால் மாவட்டம், மேலவாஞ்சூர் கிராமத்தில் இயங்கி வரும் தனியார் துறைமுகத்திற்கு சொந்தமான, தூர்வாரும் பணிக்காக மும்பையிலிருந்து 'வீரா பிரேம்' என்ற கப்பல் கடந்த 2018 - ம் ஆண்டு நவம்பர் மாதம் காரைக்கால் வந்தது. தூர்வாரும் பணி முடிந்து கப்பல் மும்பைக்கு புறப்பட்டது. அப்போது திடீரென வீசிய கஜா புயலில் சிக்கிய கப்பல் மேலவாஞ்சூர் கடலில் தரைதட்டி நின்றது. கப்பல் கேப்டன் உள்ளிட்ட 7 பேர் பல நாட்கள் கப்பலை விட்டு வெளியே வர முடியாமல் தவித்தனர்.
உடனே கப்பலை அப்புறப்படுத்த முடியாது என்று தெரிந்த பிறகு கப்பலில் உள்ள அனைவரும் வேறு கப்பல் மூலம் அவர்களது சொந்த ஊருக்கு திருப்பி அனுப்பப்பட்டனர்
இந்நிலையில் மும்பையில் உள்ள கப்பல் நிறுவன அதிகாரிகள் மற்றும் நிபுணர்கள் காரைக்காலுக்கு வந்து தரை தட்டிய கப்பலை மீட்க முயற்சி செய்தனர். ஆனால் முயற்சிகள் பயன் அளிக்காததால் கப்பலை உடைத்து எடுக்கும் முயற்சியை மேற்கொள்ள முயன்றனர். இதற்கு மத்திய மாநில அரசுகள் அனுமதி கிடைப்பதில் சிக்கல் ஏற்பட்டது.
கப்பலை உடைக்கும் போது அதிலுள்ள இரசாயனப் பொருள்கள், எண்ணெய் மற்றும் கழிவுப் பொருட்கள் கடல் நீரில் கலந்து கடல் நீர் மாசு அடைவதுடன், மீன்வளம் பாதிக்கும் என்பதால் இதற்காக மாநில சுற்றுச்சூழல்துறை அனுமதி வழங்கப்படவில்லை. இதனால் கடந்த இரண்டு ஆண்டுகளாக அங்கேயே கப்பல் உள்ளது.
தற்போது நிவர் புயல் உருவாகியிருப்பதால் புயல் காற்றில் கப்பல் சேதமானால் பல்வேறு சிக்கல்கள் உருவாகும் என்பதால் கப்பலை அங்கிருந்து அப்புறப்படுத்த மாவட்ட நிர்வாகத்திற்கு மீனவர்கள் கோரிக்கை வைத்தனர்.
இதனை ஏற்று காரைக்கால் கலெக்டர் அர்ஜுன் சர்மா, கடலோரப் படை அதிகாரிகளுடன் சென்று ஆய்வு செய்து, கடல் வளம் மற்றும் அருகிலுள்ள கிராம மக்களுக்கு எந்தவித சிக்கலும் இல்லாமல் கப்பலை அப்புறப்படுத்த ஆலோசனை மேற்கொண்டார். "நிவர் புயல் கரையை கடந்தவுடன் தரை தட்டிய கப்பலை அப்புறப்படுத்த நடவடிக்கை எடுக்கப்படும் " என்று தெரிவித்தார்.
source https://www.vikatan.com/news/tamilnadu/ship-stopped-during-kaja-cyclone-may-hit-because-of-nivar-cyclone
கருத்துகள் இல்லை:
கருத்துரையிடுக