அமெரிக்காவுக்கு அரசு முறை பயணம் மேற்கொண்ட பிரதமர் நரேந்திர மோடி, வாஷிங்டனில் உள்ள இந்திய புலம்பெயர் மக்களிடையே உரையாற்றினார். அப்போது அவர், ``ஒரு விதத்தில், இந்த அரங்கில் இந்தியாவின் முழு வரைபடத்தையும் பார்க்க முடிகிறது. இந்தியாவின் எல்லா மூலைகளிலிருந்தும் மக்களை இங்கு பார்க்க முடிகிறது. ஒரு மினி இந்தியா மாறிவிட்டதாகத் தெரிகிறது.
அமெரிக்காவில் நான் பெறும் அன்பு, அருமை, அனைத்து பெருமை எல்லாம் இந்நாட்டு மக்களுக்கே உரித்தானது. கடந்த 3 நாள்களில் அதிபர் பைடனும் நானும் நிறைய விவாதித்தோம். அனுபவம் வாய்ந்த அரசியல்வாதி அவர். இந்தியா - அமெரிக்க கூட்டாண்மையை வேறொரு நிலைக்கு கொண்டு செல்ல அவர் எப்போதும் முயன்று வருகிறார்.
இந்த 3 நாள்களில், இந்தியா மற்றும் அமெரிக்க உறவுகளின் புதிய, புகழ்பெற்ற பயணம் தொடங்கியது எனலாம். இந்த புதிய பயணம், உலகளாவிய மூலோபாய பிரச்னைகள், மேக் இன் இந்தியா, மேக் ஃபார் தி வேர்ல்டுக்கான நமது ஒத்துழைப்பு குறித்தது. தொழில்நுட்ப பரிமாற்றம் மற்றும் உற்பத்தி ஒத்துழைப்பு அல்லது தொழில்துறை விநியோகச் சங்கிலியில் ஒருங்கிணைப்பை அதிகரிப்பது உள்ளிட்ட எதுவாக இருந்தாலும், இரு நாடுகளும் சிறந்த எதிர்காலத்தை நோக்கி வலுவான நடவடிக்கைகளை எடுத்து வருகின்றன. இந்தியாவில் போர் விமானங்களைத் தயாரிக்க ஜெனரல் எலக்ட்ரிக் நிறுவனம் எடுத்த முடிவு இந்தியாவின் பாதுகாப்புத் துறைக்கு ஒரு மைல்கல்லாக இருக்கும்.
எனது வருகையின் போது, கூகுள் மைக்ரான், அப்ளைடு மெட்டீரியல்ஸ் மற்றும் பிற நிறுவனங்கள் இந்தியாவில் பெரும் முதலீடுகளை செய்வதாக அறிவித்துள்ளன. இந்த அறிவிப்புகள் அனைத்தும் இந்தியாவில் வேலைவாய்ப்பை உருவாக்க உதவும். இந்தியாவுக்கும் அமெரிக்காவுக்கும் இடையே கையெழுத்தான ஆர்ட்டெமிஸ் ஒப்பந்தம் விண்வெளி ஆராய்ச்சியில் பல வாய்ப்புகளை வழங்கும். நாசாவுடன் இணைந்து இந்தியா விண்வெளிக்கு விண்வெளி வீரர்களை அனுப்பும். அதனால்தான் 'வானம் எல்லை அல்ல' என்கிறேன்.
ஒன்றாக நாம் கொள்கைகள் மற்றும் ஒப்பந்தங்களை மட்டும் உருவாக்கவில்லை, நாம் வாழ்க்கை, கனவுகள் மற்றும் விதிகளை வடிவமைக்கிறோம். பெங்களூரு மற்றும் அகமதாபாத்தில் அமெரிக்காவின் புதிய தூதரகங்கள் திறக்கப்படும். தற்போது ஹெச்1பி விசா புதுப்பிப்பை அமெரிக்காவிலேயே செய்து கொள்ளலாம் என முடிவு செய்யப்பட்டுள்ளது.
இந்தியாவின் ஒவ்வொரு சாதனையிலும் நீங்கள் மகிழ்ச்சி அடைகிறீர்கள். யோகா தினத்திற்காக ஐக்கிய நாடுகள் சபையின் தலைமையகத்தில் இவ்வளவு பெரிய எண்ணிக்கையிலான நாடுகள் ஒன்று கூடுவதை நீங்கள் பெருமையாக உணர்கிறீர்கள். இங்குள்ள சூப்பர் மார்க்கெட்டுகளில் மேட் இன் இந்தியாவை பார்க்கும்போது பெருமையாக உணர்கிறீர்கள். நிறுவனங்களை வழிநடத்தும் இந்தியத் திறமைகளைப் பார்க்கும்போது நீங்கள் பெருமைப்படுகிறீர்கள். உலகம் முழுவதும் 'நாட்டு நாட்டு...' இசையில் நடனமாடும்போது நீங்கள் பெருமைப்படுகிறீர்கள்.
இந்தியாவின் இந்த அபரிமிதமான முன்னேற்றத்திற்குக் காரணம் நாட்டில் உள்ள 140 கோடி மக்களின் நம்பிக்கை. மோடி தனியாக எதையும் செய்யவில்லை. நூற்றுக்கணக்கான வருட காலனித்துவம் இந்த நம்பிக்கையை நம்மிடமிருந்து பறித்து விட்டது.
கடந்த சில ஆண்டுகளில் இந்தியா டிஜிட்டல் புரட்சியை கண்ட விதம் முன்னெப்போதும் காணாதது. கிராமத்தில் உள்ள ஒரு கடையில் பார்கோடு பலகையை நீங்கள் பார்த்திருக்கலாம். ஒருவேளை நீங்கள் ரொக்கமாக பணம் செலுத்த முயற்சி செய்தாலும், உங்கள் மொபைலில் டிஜிட்டல் பேமென்ட் ஆப் இருக்கிறதா என்று கடைக்காரரே கேட்கிறார். இந்த மாற்றமடைந்த இந்தியா உங்களை ஆச்சரியப்படுத்தும். இன்று யார் வேண்டுமானாலும், இந்தியாவில் எங்கு வேண்டுமானாலும் 24/7 வங்கிச் சேவை செய்யலாம். ஞாயிறு அல்லது திங்கட்கிழமை என எந்த பாதிப்பும் இல்லை.
இந்தியா ஜனநாயகத்தின் தாய் . அமெரிக்கா மேம்பட்ட ஜனநாயகத்தின் சாம்பியன். இன்று, இந்த இரண்டு பெரிய ஜனநாயக நாடுகளுக்கு இடையேயான கூட்டு வலுவடைவதை உலகம் காண்கிறது. அமெரிக்கா எங்களின் மிகப்பெரிய வர்த்தக பங்காளி. ஆனால் நமது கூட்டுறவின் உண்மையான திறன் இன்னும் வெளிவரவில்லை. இந்தியாவில் முடிந்தவரை முதலீடு செய்ய இதுவே சிறந்த நேரம். இந்தியாவில் கூகுளின் AI ஆராய்ச்சி மையம் 100க்கும் மேற்பட்ட மொழிகளில் வேலை செய்யும். இந்திய அரசின் உதவியுடன், ஹூஸ்டன் பல்கலைக்கழகத்தில் தமிழ் ஆய்வு இருக்கை நிறுவப்படும்.
எங்களிடம் இருந்து எடுக்கப்பட்ட 100க்கும் மேற்பட்ட இந்தியாவின் பழங்காலப் பொருட்களை திரும்ப ஒப்படைக்க அமெரிக்க அரசு முடிவு செய்திருப்பது மகிழ்ச்சி அளிக்கிறது. இதற்காக அமெரிக்க அரசுக்கு எனது நன்றியை தெரிவித்துக் கொள்கிறேன்.
இந்தியாவிற்கும் அமெரிக்காவிற்கும் இடையிலான கூட்டாண்மை 21 ஆம் நூற்றாண்டில் உலகை சிறப்பாக மாற்றும். இந்த கூட்டுறவில் நீங்கள் அனைவரும் முக்கிய பங்கு வகிக்கிறீர்கள். நான் இங்கிருந்து நேராக விமான நிலையத்திற்குப் புறப்படுகிறேன், உங்கள் அனைவரையும் சந்திப்பது சாப்பாட்டுக்குப் பிறகு இனிப்புச் சாப்பாடு சாப்பிடுவது போன்றது” என்றார்.
பின்னர் பிரதமர் மோடி அமெரிக்காவில் இருந்து எகிப்து புறப்பட்டுச் சென்றார்.
source https://www.vikatan.com/government-and-politics/politics/prime-minister-modi-speaks-in-india-diaspora-community-in-usa
கருத்துகள் இல்லை:
கருத்துரையிடுக