தமிழக அரசால் தடை செய்யப்பட்ட பான்பராக், குட்கா போன்ற பொருட்களை விற்பனை செய்தவர்களுக்கு நீதிபதி வித்தியாசமான தண்டனையை வழங்கியதோடு, அவர்களுக்குக் கடுமையான அறிவுரையும் வழங்கியிருக்கிறார்.
திமுக எதிர்க்கட்சியாக இருந்தபோது தமிழகத்தில் தடை செய்யப்பட்ட குட்கா விற்பனை அதிக அளவில் நடப்பதைச் சுட்டிக்காட்டும் வகையில், குட்கா பொட்டலங்களைச் சட்டப்பேரவைக்குக் கொண்டு சென்று காண்பித்தார் ஸ்டாலின். ``கமிஷன் வாங்கிக்கொண்டு, அதன் விற்பனைக்குப் பச்சைக்கொடி காட்டியவர்களுக்குப் பொறுக்கவில்லை. சட்டப்பேரவை உறுப்பினர்களுக்கான உரிமையையே பறிக்க நினைத்தார்கள். இந்த வேகத்தை குட்கா விற்பனையைத் தடுப்பதில் காட்டியிருக்கலாம். குட்கா அரசின் ஆட்டம் விரைவில் முடியப்போகிறது” என்று அ.தி.மு.க அரசின் அவலத்தைச் சுட்டிக்காட்டி பத்திரிகைகளுக்குப் பேட்டியளித்தார்.
ஆனால் இன்று திமுக ஆட்சியில் அமர்ந்தும், குட்கா விவகாரம் படுஜோராக நடந்துகொண்டிருப்பதாக ஜூனியர் விகடனில் அட்டைப்படக் கட்டுரையாகச் செய்தி வெளிவந்தது. இதற்குப் பதிலளித்த அமைச்சர் மா.சுப்பிரமணியன், "எந்தக் கடையில் குட்கா விற்கப்படுகிறதோ, அந்தக் கடையை உடனடியாக மூடி சீல் வைக்க வேண்டும்.
தமிழ்நாட்டில் குட்கா இல்லை என்கிற நிலையை ஓரிரு மாதங்களில் உருவாக்கியே தீருவோம்" என உத்தரவாதம் அளித்தார். அதன் பிறகு, தமிழ்நாடு முழுவதும் போலீஸார் தீவிர குட்கா தடுப்பு நடவடிக்கையில் ஈடுபட்டு போதைப்பொருள்கள் பரவலைத் தடுத்துவருகின்றனர்.
Also Read: `’இனி மது குடிக்க மாட்டோம்’ ; உறுதியளித்தால் ஜாமீன்!' - கவனம் ஈர்த்த உயர் நீதிமன்ற உத்தரவு
இந்நிலையில், திருச்சி மாவட்டம் திருவெறும்பூர் பகுதிகளில் குட்கா விற்பனை படுஜோராக நடப்பதாக போலீஸாருக்கு ரகசியத் தகவல் கிடைத்துள்ளன. அதன் அடிப்படையில் காவல் உதவி ஆய்வாளர் நாகராஜன் தலைமையிலான போலீஸார் திருவெறும்பூர் பகுதியில் அதிரடி ஆய்வை மேற்கொண்டார்கள்.
அப்போது, ரவிக்குமார் என்பவரது டீக்கடையில் பதுக்கி வைக்கப்பட்டிருந்த ரூ. 6 ஆயிரம் மதிப்புள்ள ஐந்து குட்கா பண்டல்களை போலீஸார் பறிமுதல் செய்தனர். அதேபோல் காட்டூரில் பகுதிகளிலும் போலீஸார் சோதனையில் ஈடுபட்டுவந்தனர். அங்கு காளியம்மாள் என்பவருக்குச் சொந்தமான பெட்டி கடையில் சோதனை நடத்தியதில் 40 ஆயிரம் மதிப்புள்ள குட்கா 35 குட்கா பண்டல்களை போலீஸார் கைப்பற்றினர்.
Also Read: ஆந்திரா: இழப்பீடு விவகாரத்தில் மெத்தனம்! - ஐ.ஏ.எஸ் அதிகாரிகளிடம் அதிரடிகாட்டிய உயர் நீதிமன்றம்
மேலும் காளியம்மாள், ரவிக்குமார் ஆகிய இருவர் மீது வழக்கு பதிவு செய்து போலீஸார் கைது செய்து நீதிமன்றத்தில் ஆஜர்படுத்தினர். அவர்களை நிபந்தனை ஜாமீனில் விடுவித்ததோடு, `குட்கா போன்ற போதைப் பொருட்களைத் தமிழக அரசு தடைசெய்துள்ளது உங்களுக்குத் தெரியாதா? இதுவே கடைசியாக இருக்கட்டும்’ என்று கண்டித்திருக்கிறார். அத்தோடு, அவர்களுக்கு நூதன தண்டனைகளை வழங்கியிருக்கிறார்.
``இருவரும் 20 நாட்கள் தினந்தோறும் திருவெறும்பூர் காவல் நிலைய வளாகத்தைச் சுத்தம் செய்ய வேண்டும். மேலும் மரத்தில் தங்கியிருக்கும் பறவைகளுக்கு உணவு அளிக்க வேண்டும்” என்ற இரண்டு நிபந்தனைகளைக் கொடுத்து அவர்களை ஜாமீனில் விடுவித்தார். இதனைத் தொடர்ந்து அவர்கள் இருவரும் காவல் நிலைய வளாகத்தில் சுத்தம் செய்தும் பறவைகளுக்கு உணவளிக்கும் விதமாக மரத்தில் மண் சட்டிகள் தொங்கவிட்டு அதில் உணவும் நீரும் வைத்துக் கவனித்து வருகின்றனர். நீதிபதியின் இந்த தீர்ப்பை அனைவரும் பாராட்டி வருகின்றனர்.
source https://www.vikatan.com/government-and-politics/judiciary/clean-the-police-station-and-feeds-the-bird-judgement-in-gudka-case
கருத்துகள் இல்லை:
கருத்துரையிடுக