பேருந்து வசதியில்லாமல் பலவருடங்கள் தவித்த கிராம மக்களின் கோரிக்கையை ஏற்று, ஐந்தே நாள்களில் கரூர் மாவட்ட ஆட்சியர் அந்த கிராமத்துக்கு புதிய அரசு பேருந்து வசதியை ஏற்படுத்தி, அந்த கிராம மக்களை நெகிழ வைத்திருக்கிறார்.
Also Read: பள்ளிச் சுவரில் ஒட்டபட்ட தன் பிறந்தநாள் போஸ்டரை கிழிக்கச் சொன்ன குளித்தலை எம்.எல்.ஏ!
கரூர் மாவட்டம், தான்தோன்றிமலை ஒன்றியத்தில் இருக்கிறது கருப்பம்பாளையம். இந்த கிராமத்தில் பலவருடங்களாக பேருந்து வசதியில்லை. தங்கள் கிராமத்துக்கு பேருந்து வசதி செய்து தரும்படி அதிகாரிகள், அரசியல்வாதிகள் என்று பலருக்கும் தொடர் மனுக்கள் அனுப்பி வருகிறார்கள். இந்த நிலையில், தான்தோன்றிமலை ஊராட்சி ஒன்றியத்துக்குட்பட்ட பல்வேறு பகுதிகளில் மேற்கொள்ளப்பட்டு வரும் வளர்ச்சித்திட்டப் பணிகள் குறித்து கரூர் மாவட்ட ஆட்சியர் பிரபுசங்கர், கடந்த 15 - ஆம் தேதி ஆய்வுசெய்ய சென்றார். அப்போது, அங்கே வந்த கருப்பம்பாளையம் ஊராட்சியை சேர்ந்த பொதுமக்கள், அவரிடம் கோரிக்கை மனு ஒன்றை அளித்தனர். அதில், 'எங்கள் கிராமத்தில் பலவருடங்களாக பேருந்து வசதி இல்லை. அவசரத் தேவைகளுக்கு கரூர் சென்று வரக்கூட மிகவும் சிரமபடுகிறோம். பள்ளி, கல்லூரி செல்லும் பிள்ளைகளும், வேலைக்குச் செல்லும் இளைஞர்களும் பேருந்து வசதி இல்லாமல் அவதியுற்று வருகிறார்கள். அதனால், எங்கள் கிராமத்துக்கு பேருந்து வசதி ஏற்படுத்தி தரவேண்டும்' என்று கோரிக்கை விடுத்திருந்தனர்.
அவர்களின் கோரிக்கையை நிறைவேற்றுவதாக வாக்குறுதி கொடுத்தார். அதேபோல், 'கருப்பம்பாளையம் வரை பேருந்து செல்ல நடவடிக்கை எடுக்க வேண்டும்' என்று கரூர் மாவட்ட போக்குவரத்துத்துறை பொது மேலாளருக்கு ஆட்சியர் உத்தரவிட்டார். அதனைத் தொடர்ந்து, மக்கள் கோரிக்கை வைத்து ஐந்து நாள் கடந்த நிலையில், கருப்பம்பாளையத்துக்கு அரசு பேருந்து வந்திருக்கிறது. தினந்தோறும் காலை 9.25 மணிக்கு அப்பிப்பாளையம் முதல் கரூர் வரை உள்ள நடையினை கரூப்பம்பாளையம் வரை தொட்டு இயக்கவும், மாலை 6.20 மணிக்கு கரூர் முதல் கருப்பம்பாளையம் வரை இயக்கவும் என தினமும் இரண்டு முறை பேருந்து கருப்பம்பாளையம் வரும் வகையில் நகரப்பேருந்துகளை இயக்க நடவடிக்கை எடுக்கப்பட்டுள்ளதாக சொல்லப்பட்டுள்ளது. பலவருட போராட்டத்துக்குப் பிறகு கருப்பம்பாளையம் வந்த பேருந்தில் மக்கள் மகிழ்ச்சியாக ஏறி பயணித்தனர். மாவட்ட ஆட்சியர் பிரபுசங்கர் பேருந்தில் ஏறி, பயணிகளிடம் சகஜமாக பேசினார்.
Also Read: `கிராம சபையில் மாணவியின் கேள்வியால் கிடைத்த பேருந்து வசதி!' - ஆச்சர்யம் அளித்த மதுரை எம்.பி!
இதுகுறித்து, கருப்பம்பாளையம் மக்களிடம் பேசினோம்.
"எங்க ஊர்ல பேருந்து வசதி இல்லாம பலவருடங்களாக நாங்க அல்லாடி வந்தோம். மனுமேல மனுவா அனுப்பினோம். 'உங்கள் ஊருக்கு பேருந்து விட்டால், வருவாய் இருக்காது'னு அதிகாரிகள் கைவிரிச்சாங்க. அப்பதான், எங்க ஊருக்கு வந்த ஆட்சியர்கிட்ட மனு கொடுத்தோம். எங்க பிரச்னையைத் தீர்த்துட்டார். எங்களின் பலவருடப் பிரச்னையை ஐந்தே நாளில் தீர்த்த அவரை மறக்கமாட்டோம்" என்றனர்.
source https://www.vikatan.com/news/tamilnadu/karur-collector-solved-village-people-problem-within-5-days
கருத்துகள் இல்லை:
கருத்துரையிடுக